بالبلدي .. بورصة - منتدى المحاسبين المصريين

10-07-2009, 03:40 PM

akrm-nagy

مشارك فعال

تاريخ التسجيل: Aug 2009

الدولة: egypt

العمر: 39

المشاركات: 139

بالبلدي .. بورصة

بسم الله الرحمن الرحيم

انا لا أهدف في هذا الموضوع الى مخاطبة الأساتذة والمضاربين العمالقة فى عالم البورصة

والمحاسبة والاقتصاد .. بل اهدف الى مخاطبة اصحاب العقول البسيطة

والمتوسطة من عامة الشعب المصرى الغير مثقف أقتصاديا ولا محاسبيا .

أن من اكبر مشاكل ومعوقات البورصة المصرية هو أنه لا يقدم على الاستثمار

فيها سوى فئة محدودة جدا من الشعب المصرى ..

فحديثى هذا لتلك الفئة الكبيرة التى لا تعرف عن البورصة سوى اسمها...

وكما قال أستاذى د/ عادل قاسم :

خاطب الناس لا باللغة التى تجيد التحدث بها بل باللغة التى يفهمونها ويستوعبونها

لذا سيكون أسلوب حديثي باللغة العامية الدارجة تسهيلا وتيسرا على القارئ..

وهذا الموضوع يتم فى أطار محاولة متواضعة جدا لتنشيط الأستثمار فى البورصة

بدفع عوام الشعب للأشتراك فى واحد من اهم وأكبر عوامل الحقن بالاستثمارات

والتمويل لذلك الجسد المريض المسمى بالاقتصاد المصرى

10-07-2009, 03:43 PM

akrm-nagy

مشارك فعال

تاريخ التسجيل: Aug 2009

الدولة: egypt

العمر: 39

المشاركات: 139

مشاركة: بالبلدي .. بورصة

كـــــــــلمة للمبتدئين

طبعا انت اول ما بتشوف النشرة الاقتصادية فى نشرة الاخبار بتقلب وتنفض

لأنك بتحس انك بتسمع كلام هندى او صينى او لاتينى

طيب هسألك سؤال:

*هل داعب الاستثمار فى البورصة تفكيرك؟؟!!

- جواب (1) :يا عم البورصة دى محتاجة ناس فاهمة وواعية وخبرة ..

وكمان محتاجة فلوس كتير .

- جواب (2) : انا سمعت ان الواحد ممكن يخسر فلوسة كلها فى يوم واحد ....

لالالا مقدرش اغامر بفلوسى يا عم

- رد(1) : محدش اتولد خبير اقتصادى او مضارب عملاق..

عمالقة الاقتصاد دول كانو فى يوم من الايام زيك كدة مش فاهمين حاجة

وكمان انت مش محتاج انك تبقى خبير او مضارب عملاق علشان تدخل عالم

البورصة...كل اللى انت محتاجة شوية معلومات بدائية عن طبيعة البورصة

- رد(2) :تبقى عبيط لو فكرت ان فى طريقة امنة 100% للحفاظ

على فلوسك..حتى لو حطيتهم تحت البلاطة

لو انت حاطط 100 جنية تحت البلاطة والنهاردة كان ممكن تشترى بيهم

3 كيلوا لحمة .. كمان خمس سنوات مش هتعرف تشترى بيهم كيلوا واحد

يبقو بينقصوا ولا لأ .. وبتخسر قوتهم الشرائية ولا لأ

فى قاعدة عايزيين نحفظها صم وأحنا بنتعامل فى البورصة

القاعدة دى هيا أ ب .. بورصة

عائد اعلى وربح اكثر= درجة مخاطرة اكبر

كل ما هتخاطراكتر كل ما تكسب اكتر دة قانون البورصة.

وكمان لما تحط فلوسك فى البنك مش كفاية انت عارف ان الدراسات

اثبتت انة على المدى البعيد الفرق بين العائد اللى بيحققة البنك

وبين العائد من اعمال البورصة =649% يعنى حوالى 6 اضعاف ونصف

ثم أن فى بعض البنوك بتاخد اموالك وتضارب بيها فى البورصة

وتديلك ملاليم الفايدة يا غلبان وتاكل هى الهوبر كلها.

قول بقى انك لسة مش بتفكر فى حكاية البورصة دى !!!

وعموما انا هعرض عليك الموضوع فى لغة عامية سهلة بعيدا عن العقد والكلاكيع

10-07-2009, 03:45 PM

akrm-nagy

مشارك فعال

تاريخ التسجيل: Aug 2009

الدولة: egypt

العمر: 39

المشاركات: 139

مشاركة: بالبلدي .. بورصة

بعض المصطلحات المكلكعة

انا عاوز بس أشرحلك شوية مصطلحات ممكن تقابلك فتتعقد منها ..بس هيا سهلة جدااا

القوة الشرائية : مصطلح بيعبر عن اللى تقدر تشترية بالفلوس يعنى زمان الجنية

كان ممكن تشترى بية 4 قزايز حاجة ساقعة (الواحدة بربع جنية)

النهاردة القوة الشرائية للجنية انخفضت للربع بقى بجيب قزازة واحدة بس

البورصة: هى سوق زى اى سوق عادى ... سوق المواشى.. سوق الخضار..

سوق العربيات بس دى سوق للأسهم والسندات والاوراق المالية

الاسهم والسندات: هنتكلم فيهم كمان شوية بأستفاضة

المضاربة: هى عملية جنى الارباح من خلال عمليات البيع والشراء المتكررة داخل

البورصة أو ممكن تكون جنى الخسائر بس لازم يكون بيتم البيع والشراء بصفة

متكررة وفى فترة قصيرة .

قانون العرض والطلب: لو انت بتحب الشيبسى جدا وبتخصص 2 جنية كل يوم

لأكل الشيبسى من مصروفك والكيس تمنة ربع جنية يبقى هتجيب 8 اكياس

اما لو الكيس سعرة ارتفع وبقى تمنة جنية هتجيب كيسين بس

أو تلاتة على الاكثر .. صح؟؟!!

هو دة قانون العرض والطلب عندما تزيد الاسعار تقل كمية الطلب

وعندما تقل الاسعار تزيد كمية الطلب (جانب العرض لم يفسر)

الاكتتاب العام: هو ان تطرح احد الشركات اسهمها فى احد البنوك

لأى شخص يشتريها.. ودة عامل زى ما يكون بتشتريها لسة على الزيرو

وممكن بعد كدة تبيعها لأى شخص عن طريق البورصة يعنى البورصة

بتسهل عمليات اعادة البيع والشراء وليس البيع لأول مرة

لأن البيع لأول مرة بيتم عن طريق البنك

التداول: اى عمليات الشراء والبيع للأسهم والسندات داخل البورصة اثناء الجلسة

المحفظة المالية: هى عبارة عن محفظة مالية وهمية يعنى بالبلدى كدة

عندك كام سهم عادى وكام سهم ممتاز وكام سند.. دول كلهم اسمهم محفظتك المالية

سعر الاقفال: هو سعر السهم او السند الذى اقفلت علية جلسة امس فى البورصة

سعر الافتتاح: هو سعر السهم او السند المفتتحة بة جلسة اليوم ومن الطبيعى

ان يكون سعر اقفال امس هو سعر افتتاح اليوم ولكن ساعات بتحصل بعض

التغيرات الفجائية بتؤدى الى اختلاف السعرين

المحللين الماليين (السماسرة) : هم الناس اللى بنشوفهم فى التلفزيون قاعدين على

أجهزة الكمبيوتر وهم اللى بيقوموا بعملية التداول وهم فقط المسؤلين عن

البيع والشراء داخل البورصة لحساب موكليهم من الجمهور والبيع والشراء

بيتم بأسم السمسار وليس بأسم صاحب السهم ضمان للسرية

10-07-2009, 03:47 PM

akrm-nagy

مشارك فعال

تاريخ التسجيل: Aug 2009

الدولة: egypt

العمر: 39

المشاركات: 139

مشاركة: بالبلدي .. بورصة

مــــــــــا هى الاسهم والسندات؟؟

اولا : السهم

انت لما تروح لعم عبدو البقال اللى على باب شارعكم وتقولة عايزيين نعمل بزنس

مع بعض يا عم عبدوا.... فيقولك أزاى ؟؟؟

تقولة انا هديلك4000 جنية تشترى بيهم جبنة وسمنة وشيبسى وتجدد المحل

والمكسب اللى يطلع نقسمة بينا .

يبقى انت كدة ساهمت مع عم عبدو أوانت مساهم فى المحل والمساهمة دى نشأت

لأن عم عبدوا مش معاة فلوس يشغلها والا كان قالك العب بعيد يا شاطر

وكان عمل الكلام دا بفلوسة وخد كل المكسب لية

نفس الموضوع برضوا بيكون فى شركات رأس مالها كبير جدا لا يقدر على

تكوينة شخص او عدة اشخاص فبيطرحوا أسهم بأسم الشركة للأكتتاب العام

ولما بتشترى انت السهم بتبقى اسمك مساهم فى رأس مال الشركة وبتعتبر

مالك من ملاك الشركة بقدر عدد الأسهم اللى معاك وطبعا فى انواع للأسهم

الاسهم العادية والاسهم ممتازة

والسهم دة زمان كان عبارة عن ورقة كبيرة فى حجم صفحة من ملحق الجمهورية

ومكتوب علية اسم المساهم وقيمة السهم الاسمية وطبعا اسم الشركة ونبذة

عن نشاطها وكان لما يجى مالك السهم يبيعه لمشترى جديد يكتب على

ظهر الورقة (السهم) بيعت لأحمد وأحمد لما يبيعه يكتب بيعت لمحمد ومحمد

لما يبيعه يكتب بيعت لمحمود وهكذا وكان البيع بيتم على القهاوى تلاقى واحد

واقف على كرسى بيقول بأعلى صوتة :

معايا سهم للمصرية للأتصالات بـ 100 جنية مين يشترى ؟؟؟

السهم ارباحة عالية وسعرة فى الطالع مين يشترى ؟؟؟....

طب دلوقتى اية اللى بيحصل ؟؟

اصبحت الاسهم دى مجرد ارصدة على الكمبيوتر بضغطة زر ينتقل من رصيد

احمد100 سهم لرصيد محمد ودى وظيفة شركة هنذكرها بعدين اسمها شركة

مصر للمقاصة والإيداع والقيد المركزي .. والبيع بيتم داخل جلسات فى البورصة ..

يعنى البورصة اللى أنت خايف منها دى كانت زمان عبارة عن قهوة ودلوقتى

برضوا هيا قهوة بس فيها شوية نظام ..

ثانيا: السند

لما بقى عم عبدو البقال هو اللى يجيلك يعيط ويقولك والنبى ممعيش فلوس

وبيتى هتيخرب ابوس أيدك سلفنى 4000 جنية اشغل بيهم المحل وهرجعهم لك

بعد سنتين بفوايدهم..

يبقى كدة انت سندت عمك عبدوا بفلوس لمدة سنتين زى ما بتسند عيل صغير كدة

لغاية ما يتعلم المشى ....والسندات جاية من السند

برضوا فى شركات رأس مالها كبير محتاجة قروض فبدل ما تاخدها من البنوك

تاخدها من الجمهور يعنى الجمهور بيسندها لفترة معينة

وطبعا السندات أكثر أمنا من الاسهم بس عائدها أقل

يعنى لو تعرضت الشركة للأفلاس وفى خزنتها 100 الف جنية

اول من يأخذ مستحقاتة وفلوسة اصحاب السندات

ولو فضل فلوس ياخدوا اصحاب الاسهم الممتازة

ولو فضل فلوس ياخدوا اصحاب الاسهم العادية

اما فى الربح يكون الترتيب عكسى اسهم عادية وبعدين ممتازة وبعدين سندات

تذكر القاعدة ( ربح اعلى = درجة مخاطرة اعلى)

10-07-2009, 03:51 PM

akrm-nagy

مشارك فعال

تاريخ التسجيل: Aug 2009

الدولة: egypt

العمر: 39

المشاركات: 139

مشاركة: بالبلدي .. بورصة

كيفية تحديد اسعار الأوراق المالية داخل البورصة:

اى سهم بيبقى لية سعر أسمى او قيمة أسمية ودى بتبقى محددة من

الشركة المصدرة للأسهم وفى حاجة اسمها القيمة السوقية للسهم ودى ممكن

تكون اكبر من القيمة الاسمية (فى حالة الربح) او اقل ( فى حالة الخسارة)

والقيمة السوقية دى هى السعرالمتداول فى البورصة

وطبعا وقطعا سعر اى سلعة بما فيها الاسهم والسندات بيتحدد على اساس

قانون العرض والطلب .. وكل ما الطلب على السهم بيزيد كل ما سعرة بيرتفع

كل ما ارباحك بتزيد في المضاربة

طب تعالى نشوف أسئلة واحد مبتدأ زيك فى عالم البورصة:

1-اية اللى بيخلى سعر السهم يزيد ؟

سعر السهم بيزيد لما طلب الشراء على السهم بيزيد.

2- وأية اللى بيخلى طلب الشراء على السهم يزيد ؟

لما يكون السهم دا أحلى من غيرة من الاسهم .

3-طيب واية اللى يخلى السهم احلى من غيرة ؟

كل ما يحقق ارباح اعلى كل ما يكون احلى

4-طيب وأن أعرف منين أنة بيحقق ربح أعلى؟؟

شوف القوائم المالية بتاعة الشركة مصدرة السهم ارباحها كام

5- يعنى أشوف القوائم المالية للشركات .. والشركة اللى ربحها أعلى تبقى أحسن ؟

لأ طبعا مش جايز شركة نصابة .. لازم تشوف تقرير مراجع الحسابات

علشان يأكد لك أن الشركة حسابتها سليمة وأربحها حقيقة ومش وهمية

6- خلاص يعنى أشوف الشركات اللى المراجع قال عن حسابتها سلمية

وأستثمر فى واحدة منهم ؟؟؟

اة ممكن .. وخصوصا بعد ما أصبح من وظيفة المراجع مراجعة التنبؤات المالية

المستقبلية للشركة .. لكن دا فى حالة انك عاوز أى ربح والسلام .. أنما لو عاوز

أعلى ربح ممكن وأعلى درجة أطمنان ممكنة يبقى لازم تروح لمحلل مالى ..

لأن المراجع بيقولك الشركة دى حلوة والشركة دى وحشة ..أما المحلل المالى

بيقولك الشركة دى حلوة والشركة دى أحلى .. وبعدين أنت كدة كدة رايح

لمحلل مالى لأانك متعرفش تدخل البورصة من غيرة ...لأنة مينفعش تضارب بأسمك

لازم بأسم محلل مالى (السمسار)

وانت فى حالة شرائك أسهم شركة ناجحة فأمامك طريقين للربح :

الاول : قصير الأجل (المضاربة)

ودا عن طريق البيع والشراء المتكرر للأوراق المالية

يعنى السمسار بتاعك ( المحلل المالى) بيعرض سهم شركة ناجحة ومحققة

أرباح للبيع داخل البورصة فبيقابل عرضة طلب من 5 سماسرة بشراء هذا السهم

فبيحس السمسار ان هذا السهم مرغوب فيه يقوم يرفع سعره ... فسمسارين

يسحبوا طلبهم بالشراء ويفضل 3.....يرفع سمسارك السعر مرة اخرى...

فيسحبوا 2 طلبهم ويتبقى واحد فيبيع لة سمسارك الاسهم ....

او قد يحدث العكس ان سمسارك ينزل فى سعر السهم علشان حد يعرض يشترية

ودى حاجة عادية جدا فى علم الاقتصاد اسمها اليات السوق الحر. أو كفأة السوق

الثاني : طويل الأجل ( الأستثمار)

ودا أنك تحتفظ بما معك من أسهم وسندات وعلى المدي البعيد تاخد توزيعات الأرباح بتاعتهم سنوياً او فوائدهم

ولا بتبيع ولا بتشتري

10-07-2009, 03:53 PM

akrm-nagy

مشارك فعال

تاريخ التسجيل: Aug 2009

الدولة: egypt

العمر: 39

المشاركات: 139

مشاركة: بالبلدي .. بورصة

مؤسسات وثيقة الصلة:

من المؤسسات وثيقة الصلة بالبورصة مؤسستين:

اولا: هيئة سوق المال

هيئة سوق المال انشئت اواخر السبعينات كهيئة رقابية منظمة يعنى هى اللى بتنظم

اعمال البورصة وتداول الاسهم والسندات بداخلها واى خروج عن القانون

او تلاعب هى اللى بتوقفة وبتعاقب علية علشان تحافظ على جو ومناخ الاستثمار

فى مصر ودى كانت كل وظائفها لغاية عام 1992

لأن سنة 1992 صدر قانون يضيف لأعمالها نشر المعلومات عن الاوراق المالية

والحفاظ على شفافية السوق ووضوحة ومتابعة المعلومات المضلله والعمل على الحد

منها واخيرا صدر قرار فبراير 2006 بمعاقبة من ينشر معلومات مضللة فى أسواق المال

ثانيا: شركة مصر للمقاصة والتسوية والقيد المركزى :

ودى وظيفتها تسجيل وتقييد اعمال البورصة

يعنى كل ما يحدث خلال الجلسة اليومية يتم تقييدة وحفظة حفظ مركزى

(اى على مستوى الدولة ككل)

اى يتم تقييد مين باع لمين ومين اشترى من مين...

ودة رصيد محفظتة المالية كام ودة كام

ومن وظائفها ايضا :

- الرهن

- القيد المركزى

- الايداع المركزى

- ادارة صندوق ضمان التسويات

وأهمها فى نظرى الوظيفة الاخيرة لأنها بتحقق جو الامان فى مناخ الاستثمار

والشركة دى لها فرعين فقط فى الجمهورية بالكامل والاتنين فى القاهرة

فرع رمسيس وفرع طلعت حرب

10-07-2009, 03:54 PM

akrm-nagy

مشارك فعال

تاريخ التسجيل: Aug 2009

الدولة: egypt

العمر: 39

المشاركات: 139

مشاركة: بالبلدي .. بورصة

مقدمة لأليات العمل داخل البورصة:

مبدئيا مفيش فى مصر غير بورصتين فقط القاهرة والاسكندرية

عنوان بورصة القاهرة: 4أ شارع الشريفين –وسط المدينة

وعنوان بورصة الاسكندرية : 11 شارع طلعت حرب - الاسكندرية

البورصة عبارة عن مبنى كبير ولكن كل المهم فى المبنى دة هو قاعة الجلسات

وهى موضع حديثنا

القاعة تحتوى على :

- حوالى 40 مقعد للسماسرة

- مقاعد للمراقبين لأعمال البورصة

- شاشة عرض الكترونية كبيرة فى المنتصف تعرض الوقت والتاريخ

- شاشتى عرض الكترونيين اكبر على اليمين والشمال لعرض اسعار الاسهم

- شاشة عرض الكترونية كبيرة بتستخدم لعرض حاجة اسمها الاسهم المرفوع

عنها الحدود السعرية وهنتكلم عنها بأستفاضة فيما بعد

- شاشة عرض الكترونية برضوا كبيرة بتعرض ملخص الاحداث يعنى حالة

المؤشر العام للتداول وكمية التداول وأعلى ورقة للتداول...الخ

المؤشـــــــــــــر العام للتداول:

تخيل انك بتتفرج على طفل ماسك لعبة اليويو

(العصفورة اللى فيها استك وبتتهزهز صعودا وهبوطا) والطفل دة بيصعد تل أو جبل

او مرتفع ....... تخيل هذا المنظر !!!

دة هو منظر المؤشر العام للتداول فى مصر

فى الاساس صاعد بأستمرار ولكن اثناء صعودة يتذبذب صعودا وهبوطا

ولكنة صاعد واكيد أنت شفت صورة المؤشر دة فى الجريدة او فى التلفزيون

والمؤشر دا بيتم قياس أرتفاعة او هبوطة بالنقطة .

10-07-2009, 03:55 PM

akrm-nagy

مشارك فعال

تاريخ التسجيل: Aug 2009

الدولة: egypt

العمر: 39

المشاركات: 139

مشاركة: بالبلدي .. بورصة

ألـــــــــيات العمل داخل البورصة

جلسة التداول بتفتتح الساعة 11.30 صباحا بالظبط وبتخلص الساعة 3.30

يعنى حوالى 4 ساعات

الجلسة طبعا هى السماسرة والسماسرة هم الجلسة ومفيش جلسة من غيرهم

بيبدأوا يعرضوا الاسهم اللى عايزين يبيعوها ودة طبعا على الكمبيوتر والـ links

بين الاجهزة .. وشوية شوية تلاقى بقى التداول بدأ يشتغل ودة بيبيع ودة بيشترى

وطبعا كلو عن طريق الكمبيوتر مفيش حد بيقوم من مكانة الا علشان يشرب

او يسلم على زميل .

كنت بقولك فى شاشتين عرض كبار لعرض اسعار الاسهم دول بيعرضوا اسم السهم

وسعر اقفال امبارح وسعر افتتاح النهاردة وحركة التداول على السهم( بيع او شراء)

والسهم اللى سعرة بيعلى بيكتب باللون الاخضر واللى سعرة بينزل بيكتب

باللون الاحمر واللى سعرة ثابت بيكتب باللون البرتقالى

وبرضوا قلتلك فى شاشة بتعرض الاسهم المرفوع عنها الحدود السعرية

والاسهم دى موضوع كبير:

من قانون البورصة ان اى سهم او سند لأى شركة زاد سعرة عن نسبة 5%

او قل سعرة عن نسبة5% فى الجلسة الواحدة يقف التداول علية لمدة نصف ساعة

يعنى لو زاد جلسة النهاردة 5% وجلسة بكرة 5% وجلسة بعد بكرة 5%

دى مش مشكلة خالص انما لو زاد فى جلسة واحدة 6% يقف التداول علية

لمدة نصف ساعة

اما الاسهم المرفوع عنها الحدود السعرية لايقف التداول عنها لو حتى وصلت

النسبة بالزيادة او النقص الى 20% والشركات صاحبة الاسهم الغير محظورة

فى مصر36 شركة تقريبا منها ( الاسكندرية الوطنية للحديد والصلب –

المصرية للأتصالات – مجموعة هيرمس – القابضة المصرية الكويتية –

مدينة الانتاج الاعلامى - فودا فون - اوراسكم تيلكوم القابضة .... الخ )

اعتقد كلها شركات غنية عن التعريف ومشهورة جدا .

وطبعا كل اللى بيحصل داخل الجلسة سواء فى القاهرة او اسكندرية بيرسل فورا إلى

شركة مصر للمقاصة للتسجيل والتقييد عن طريق نظام شبكات يستحيل اختراقة

10-07-2009, 03:56 PM

akrm-nagy

مشارك فعال

تاريخ التسجيل: Aug 2009

الدولة: egypt

العمر: 39

المشاركات: 139

مشاركة: بالبلدي .. بورصة

خـــــــــد بـــــالك

البورصة مليئة بالعقول الفذة اللى بتتحايل على القانون وبتجنى ارباح من الهوا...

وفى طرق كتير للتحايل على القانون هذكرلك منها موقف على سبيل المثال لا الحصر :

يكون مثلا فى خبير اقتصادى معروف او وزير اقتصاد سابق او ... او... الخ

ويكون معاة 100 سهم لشركة من اجمالى عدد اسهمها 1000 سهم

والشركة دى بتكسب واسعار اسهمها فى الطالع كل يوم ..

يقوم هو ينشر بين مساهمى هذة الشركة انة هيبيع الـ100 سهم ويبيعهم فعلا

اول ما يعرف كدة باقى المساهمين يخافوا ويبيعوا زية فورا..

ومن هنا بيسمو الاسلوب دا أسلوب قطيع الخرفان

(علشان كل الناس بتبيع زى الخرفان من غير أى اساس علمى )

هيقولوا يا عم دة راجل خبرة وفاهم اكيد الشركة دى هتخسر او هيحصلها حاجة

وبالطبع لما كلوا يبيع... اسعار الاسهم تنزل فى التراب لأن مفيش حد عايز يشترى..

يقوم الشخص او الوزير السابق دة تانى بشراء كل الاسهم بأسعار رخيصة وهو كدة

بيعمل حاجة اسمها هزة للتداول او فتح حسابات متعدة للتداول .

10-07-2009, 03:57 PM

#10

akrm-nagy

مشارك فعال

تاريخ التسجيل: Aug 2009

الدولة: egypt

العمر: 39

المشاركات: 139

مشاركة: بالبلدي .. بورصة

أخر حاجة ...

اخر خطوة انك بتاخد فلوسك وتروح لشركة سمسرة معينة .. وليكن شركه

المصرية الامريكية للوساطة فى الاوراق المالية

وبتختار هناك سمسار ( محلل مالى) تكون مستريح لة لأانك هتبقى على اتصال

دائم معاة وبأستمرار ليل نهار ونهار ليل

بس قبل الخطوة دى فى خطوة اهم بكتير وهى :

انك تحدد انت هتبقى اية فى البوصة ؟؟!

البورصة فيها نوعين من الناس

النوع الاول : المستثمر

وهو الفرد أو المؤسسة التى بتشترى الأسهم وتحتفظ بها لمدة طويلة ممكن

توصل إلى سنوات يعنى طويل الامد

الثانى : مضارب

وهو الفرد أو المؤسسة اللى بتشترى الأسهم وتبيعها فى نفس اليوم أو اليوم

التالى أو خلال فترة أقل من ثلاث أسابيع يعنى قصير الامد

فهل انت هتدخل البورصة كمستثمر؟؟

ولا كمضارب ؟؟؟

ولا الاتنين مع بعض ؟؟

ومتسألنيش ولا تسأل أى مخلوق فى الدنيا أى النوعين أفضل ...

لأن كل نوع منهم له خططه وأساليبه واستراتيجياته المنفصلة تماما عن النوع الآخر..

فأنت هتححد انت هتبقى أية ؟؟ وبعد كدا تتجة لشكرة سمسرة حسنة السمعة

وتختار سمسار حسن السمعة ... وربنا يوفقك.

تعليمات المشاركة
لا تستطيع إضافة مواضيع جديدة لا تستطيع الرد على المواضيع لا تستطيع إرفاق ملفات لا تستطيع تعديل مشاركاتك BB code is متاحة الابتسامات متاحة كود [IMG] متاحة كود HTML معطلة قوانين المنتدى