Reemdream

السلام عليكم

دا اول موضوع ليا فى المتتدى واتمنى انى استفاد اكبر استفاده من المنتدى

انا لسه متخرجه دفعة 2012 والحمد لله خرجت بتقدير جيد جداا من كلية تجارة انجليزى جامعة الزقازيق وطبعا عارفه ان التقدير فى الزمن اللى احنا فيه دا ما يأكلش عيش حاف ..

نفسى بجد ابدأ من الصفر وانمى نفسى بالكورسات واعمل CV تقيله بس مشلكتى انى مشتته ومش عارفه ابدأ منين وايه مهم اخده الاول وايه الكورس اللى محتاج اخده قدام ..

مش ها اضحك عليكوا وهاكون صريحه مع نفسى قبل اى حاجة .. انى عارفه انى غير مؤهله للشغل بالمرة لانى ما نمتش نفسى بالكورسات فى الصيف .. يعنى كتير من برامج الكمبيوتر ما بعرفش اتعامل معاها ولا حتى اخدت ICDL بش انا الانجلش بتاعى كويس
ارجووووكوا مش عاوزة حد يحبطنى انا عارفه انى لسه على اول السلم اوى واللى مصبرنى ان تقديرى كويس يعنى بكام كورس مع التقدير ممكن اعمل CV كويسه ياذن الله
وانتوا الامل بالنسبالى فى الموضوع دا .. ياريت حد يقولى كورسات ايه المهمه اللى المفروض اى محاسب مبتدىء يكون عارفها
انا حلمى انى اشغل فى الجهاز المركزى للمحاسبات !!!

وشكررررررراااااااااااا

souffle

السلام عليكم ورحمة الله
اعتقد انى اقدر افيدك بقدر الامكان بكل المعلومات اللي عندي في الشأن دة، وعلي اصحاب الخبرة الإضافة والتأكيد من قبلي ومن بعدي.

انتى مش محتاجة اى كورسات ولا اى حاجة لو هدفك فعلا الجهاز المركزي للمحاسبات :))
كل ما عليكي تنتظري الاعلان الجديد واهم شرط فيه هو التقدير لا يقل عن جيد جدا بالتالى انتى هتتقبلي ان شاء الله، وبعدها هتدخلي امتحانات قبول سهلة و معلومات عامة عن كل اللى درستيه في المراجعة والمحاسبة الإدارية والحكومية على وجه الخصوص، وبعدها هتكوني تحت التدريب لمدة 6 شهور هتتعلمي الشغل كله اللى بيعتمد في الاساس على قوة الملاحظة والذاكرة القوية للقوانين واللوائح المنظمة وطبعا محتاجة خبث :))
اخر حاجة:-
بلاش تفكري تعملي دبلومات او دراسات عليا دلوقت يعني بعد تلات اربع سنين يكون افضل لاسباب كتير
1- في شرط في جميع الدبلومات والدراسات العليا خبرة ما بين سنة لسنتين في التخصص
2- انتى لسه خارجة من دراسة ولو عملتي دبلومة بمجرد ما اتخرجتي هتتعملي معاها معاملة الدراسة العادية "مذاكرة فهم حفظ امتحان نسيان " دة غير احساسك هيزيد بمدي تخلف نظام التعليم واسلوبه
3- لما تجربي تشتغلي الاول في كل فرصة متاحة ليكي ايا كان مجالها استيعابك هيكون اكبر من حيث:
انتى بتفضلي اي مجال؟ او اى مجال فعلا محتاج دراسة عشان تقدري تضيفي انتى فيه الجديد وتطوريه؟، والدراسة كمان في قلب الشغل ممتعة "لم يسبق لي التجربة بس دة اللى انا متخيلاه" دراسة تتبعها تطبيق ومقارنة بالواقع العملي اكيد افضل من دراسة نظرية على امثلة في كتب

الكمبيوتر:
بشكل عام ويندوز واوفيس، انترنت: طوري نفسك وانك تتعودي تكتبي تقاريرك بنفسك بالتنسيق اللى يعجبك لانها مشكلة عويصة جدا في الشغل بعد كدة،
برامج محاسبية مختلفة: هتقولي زي ايه "الافضل اختاري المكان اللى اقرب لبيتك توفيرا للوقت مثلا زي الجامعة هيبقي في وحدة مخصصة بتدي كورسات في جميع البرامج المحاسبية، والريسبشن هيشرح لك اكيد طبيعة كل حاجة وانتى تختاري بالترتيب اللى انفع لك

اللغة:
في شغل بيحتاج الانجليزي بشكل اساسي في تعاملات وعلاقات تحدث وكتابة والاكيد " الجهاز المركزي مش كدة خالص اللى اتعلمتيه هتنسيه" فعموما ليكي:
هدفك انك توصلي للجهاز المركزي محتاج منك تدرسي الدورة المحاسبية بالعربي لان الحياه مختلفة خاصه ان المناهج بالطريقة الامريكية المختصرة
اما هدفك في تطوير نفسك لهدف اعلي فيما بعد دراسات عليا في الخارج ان شاء الله عايز صبر السنين " ديما بيتقالي كدة" وربنا معاكي فيه الانجليزي الجينيرال ولا اتخن كورس هيفيدك بحاجة عشان تتكلمي وتسمعي كويس كله بيعتمد على نفسك اغاني وافلام قراءة قصص انجليزي، شات مع اصحابك او ناس من الغرب "مفيدة جدا"
اما الانجليزي التجاري في كورس مشهور اللى هو بيزنس انجليش حوالى 5 ليفيلات حلو جدا واحلي ما فيه مشروع التخرج بتاعه هو دة اللى هيأثر فيكي فعلا

المعلومات المحاسبية عن طريق القراءة المستمرة"
الجهاز المركزي له مجلة دورية ربع سنوية"جميلة جدا" اقرئيها بشكل مستمر فيها رسائل ماجيستير ومواضيع ومقالات كتير مفيدةهتنمس قدراتك بشكل ملحوظ،

القدرات الخاصة:
السرعة: العبي سودوكو كتير " والله بتنفع" بس العبي الصعبة :)))
اتعلمي اسرع الطرق في الحساب جمع ضرب طرح قسمة
اتعلمي خرائط العقل في كتاب اسمه " mind mapping directed by tony bozan"
واخيرا في كتاب تاني رائع بشكل مذهل ما له علاقة بالمحاسبة خالص اسمه
جدد حياتك لـ محمد الغزالي اقرائيه ضروري هتحسي بفرق في حياتك قوة دافعة كهربائية هتنطلق فيكي ان شاء الله

طولت بالكلام واتمني تستفادي قدر الامكان من كلامي. سلام