عماد عبد اللطيف

انا هحكيلك قصه صغيره كده الأول انا عمري 22 سنه وكام شهر قدك في السن ولو قولتلك أنا معايا شهادات ايه مش هتصدق تقريبا ً 7 شهادات من الجامعه الأمريكيه في التسويق والاداره والمحاسبه الالكترونيه ومهارات البيع والاكسيل والوورد إداره الأعمال وخدت الاي سي دي ال وإعداد محاسبين ومعايا انجليزي تمام وروسي كمان أول ما النتيجه بانت وخدت الشهاده استنيت الجيش بفارغ الصبر عايز اشتغل باي طريقه وكنت مركز اني أشتغل في مصر الأول فتره قبل ما اسافر بره لعل وعسي وضعي هنا يكون أفضل مرت الأيام وأخدت تأجيل صاحبي سافر علي اول عقد جاله ب 1500 ريال السعوديه وانا فضلت هنا انا من المنصوره كنت بحب السياحه ونفسي أشتغل في المجال دا عملت حاجه جمعت كل عناوين شركات السياحه في مصر وقسمتهم كل منطقه علي حدا وبدأت رحلتي ( تستفيد من دي لازم تكون طموح وتسعي ) المهم كل انترفيو اعملها لسه جديد الاقي نفسي قولت حاجات مش المفروض اقولها واتعلم منها واخش الانترفيو التاني اغلط برده والتالت والرابه والخامس .. وكل انترفيو اعملها اتعلمت منها تستفيد من دي ( تعرف السوق عايز ايه وانته ناقصك ايه علشان تكون مؤهل ) لحد ما روحت شركه والله والله والله كل اللي هقولهولك دلوقتي صدق .. شركه كانت حلم حياتي اني اشتغل فيها بس قولت من رابع المستحيلات اني أقبل فيها دا انا حديث التخرج ومستحيل يقبلوني وناس كتير قالتلي انته بتحلم يابني دي عايزه واسطه وكلام كده عارف عملت ايه خدتها تحدي ودخلت الشركه دي وعملت انترفيو وكنت وانا بكلم المدير متزن جدا ً مظهري كان تمام قريت وجمعت معلومات كتير عن الشركه دي قبل ما اتقدم ليها .. وقالي سيب تليفونك مفتوح وهنتصل بيك قريب طلعت من عندهم قولت زي اللي فاتم ومحدش هيتصل وفقدت الأمل بس أنا مؤمن ان رزقي ربنا كاتبهولي وهاخده وسبحان الله تاني يوم علي طول اتصلوا بيا وجهزت ورقي وسافرت لشرم الشيخ علشان استلم شغلي في الفرع هناك ... تستفيد من دا ( أنك تصبر وتؤمن ان رزق هتاخده هتاخده وتسعي جامد ليه ) ومرت الأيام وكنت فرحان جدا ً بشغلي واتقدمت فيه ومديرين الفرع شكروا فيا جامد لحد ما جه نصيبي وقدمت إستقاله منها لظروف خاصه ... الشغل في مصر دلوقتي = حتي لو معاك ايه بخلاف الـ Cma مرتبك هيكون زي اللي ممعهوش حاجه لان دي سياسات شركات معروف محاسب لسه جديد = 500 جنيه كمثال محاسب معاه 10000 شهاده = 500 جنيه برده مصر إنسي إنسي انك تعرف تعمل فيها قرش .... انته يادوب تاخد منها خبره فقط عائد مادي = صفر
خد بالك بقا من كام نقطه :-
أولا ً الصلاه وتقرب لربنا وتستغفره
1 - حدد هدفك كويس
2- حدد طرق وصولك لهدفك
3- إختار الطريق السليم
4- تكون طموح جدا ً ومتفائل جدا ً
5- إسعي لرزقك ( متقولش عمده قال مفيش شغل يبقي أقعد في البيت ) لا انزل ودور علي الاقل زي ما قولتلك هتستفيد خبره
6- لو لقيت فرصه مناسبه ومرتبها قليل ( راعي ضميرك واجتهد متقولشي هشتغل علي قد فلوسهم أصلي سمعتها كتير )
7- شوف ايه اللي ناقصه وخده او عندك تقصير في ايه ونميه
8- ألصبر الصبر الصبر
في النهايه اتمني لك التوفيق
علمت ان رزقي لن يأخذه غيري فأطمئن قلبي