بخصوص التسجيل محاسب قانونى تحت التمرين

[heroman10000]

كنت عايز اعرف اية الاجراءات اللى بيعملها المحاسب القانونى للتسجيلى محاسب قانونى
علشان انا قدمت ورقى من شهرين للمحاسب القانونى ولسة متأمنش عليا وبيقولى انه مجالهوش موافقة من وزارة المالية بخصوصى هل الكلام دة صح
ارجو الرد بسرعة الله يخليكوا

[heroman10000]

الحمد لله انا بقيت محاسب قانونى تحت التمرين واحب اعرف كل اللى ماشى فى الطريق دة انه لازم يركز الكلام اللى جاى
علشان تتسجل انت محتاج من المحاسب القانونى حاجتين
الاولى انه يتامن عليك
تروح مكتب التامينات وتجيب ورقة تامينات وتجيب كربونة وتملى النموذج وتمضى انتا والمحاسب القانونى ويختم كمان وتروح انتا وهوا التامينات و سلموا النموذج
التانية جواب من المحاسب القانونى انك شغال معاه باسم سجل المحاسبين والمراجعين بس خد بالك لازم يكون بعد
ما اتامن عليك
بعد كدة تكمل باقى المستندات المطلوبة (ابحث عنها على النت هتلاقيها)
وتروح تسلم ورقك فى سجل المحاسبين والمراجعين اللى فى كوبرى القبة تطلع من المترو وتركب ميكروباص ينزلك الشهر العقارى خلف المخابرات تطلع الدور التامن و يدوك ميعاد تقريبا بعد شهر ونصف تسأل عن ورقك وان شاء الله هيقولولك الف مبروك الجواب هيجيلك على المكتب فيه رقمك كمحاسب قانونى تحت التمرين وعد بقى تلات سنين يا ريس
اتمنى اللى يستفاد يدعيلى لانى فى امس الحاجة لدعائكم

[heroman10000]

ملحوظة مهمة جداااااااااااااااااااااااااااااااااااا

استلمت جواب من سجل المحاسبين والمراجعين بوزارة المالية بخصوص اهم الموضوعات والقوانين اللى يتم دراستها خلال فترة التدريب علشان بيبقى فى لجنة بتحضرها انتا والمحاسب القانونى بعد 3 سنوات من تاريخ التسجيل هى اللى بتقرر نقلك من تحت التمرين لمحاسب قانونى من خلال امتحان شفوى
ودة نص الجواب (مفيد لكل المحاسبين سواء تحت التمرين او لا)
اهم الموضوعات والقوانين المتعلقة بالمهنة
اولا القوانين
1- قانون الشركات المساهمة (159 لسنة 1981)
2- قانون ضمانات وحوافز الاستثمار (8 لسنة 1997)
3 قانون سوق المال وتعديلاته (95 لسنة 1992)
4- قوانين الضرائب
*ضرائب الدخل (91 لسنة2005 )
*الضريبة العقارية (196 لسنة 2008)
*ضريبة الدمغة (111 لسنة 1980) وتعديلاته
* ضريبة المبيعات (11 لسنة 1991) وتعديلاته
5- قانون مزاولة المهنة (133 لسنة 1951)
6- قانون الجهاز المركزى للمحاسبات (144 لسنة 1988)

ثانيا المعايير
1- معايير المحاسبة المصرية
2- معايير المحاسبة الدولية
3- معايير السلوك المهنى
4- معايير المحاسبة المصرية للمنشات المتوسطة والصغيرة

ثالثا قواعد الحوكمة
1- الحوكمة فى الشركات
2- الحوكمة فى المكاتب المهنية
3- لجان المراجعة

رابعا عموميات
1- تطور مهنة المحاسبة فى مصر
2- التعليمات واشتراطات مزاولة المهنة

وفى الاخر تنبيه للمحاسب القانونى انه يدرب كل المحاسبين اللى عنده حتى القدامى علشان متابعة تطورات المهنة محليا و عالميا
ان شاء الله هحاول ارفع الماتيريال دى واى حاجة هعرفها هبلغكم اول باول