السلام عليكم , ياترى ممكن ألاقى عندكم حل !

[M.winner]

السلام عليكم ورحمة الله وبركاته
بسم الله الرحمن الرحيم, والصلاة والسلام على المبعوث رحمة للعالمين سيدنا محمد, وبعد :
أنا دخلت وكتبت الموضوع عشـان ممكن ألاقي حديقولي اقتراح أو حل لمشكلة مش واخد بالي منهـا , فـ ياريت لو حـد يقدر يساعدني بمجرد دعـوة حتى 

أنا خريج كلية تجارة جامعة المنصورة (2012) تقدير جيد
أولا: بشتغل بقالي دلوقت 3 سنين مساعد صيدلي , اتعلمت كتير جدا عن التعامل مع المرضـى و عرفت كتير جدا من الأدويـة , لدرجة تؤهلني إن ممكن بعد كمان سنة كدة أخـد صيدلية باسم دكتور واشغلها لحسابي, بس للأسف فيه مشكلة ف توفير المال اللي يخليني أعمل كدة , وبكدة الموضوع دة خرج من ضمن أهدافي مؤقتـا ..

ثانيا: أنا بحب مجال المحاسبة, ونفسي أعمل حاجة أخدم بيها المجال دة, وبفكر إزاي يكون الطالب ف كلية تجارة بيدرس المواد نظري, وبيطبق عمـلي ف الوقت ذاته , بس طبعا الموضوع دة صعب تطبيقه بس مش مستحيل ..
المهم إن ف مجال المحاسبة قدامي اتنين حـل
1-أكمل دراسـة عشان أحصل ع الماجستير وبعد كدة الدكتوراة إن شاء الله, بس دة طبعا محتاج مصاريف, ومش عارف هل هينفع أشتغل وانا بدرس , طيب لو كان دة عادي , طيب لو انا خلصت الماجستير أو الدكتوراة ممكن يكون ليا فرصة ف حصول علي وظيفة كويسة بعد التعب دة, ولا برده زي دلوقت .. أقصد الهدف من دة إية !!
2- أشوف مكتب محاسبة , أتدرب فيه لحد ما أبقى حبرة , وإما أقدم ف شركات , أو أستنا 3 سنين وبعدين أفتح مكتبة محاسبة .... بس مش لاقي مكتبة محاسبة كويس صاحبه يهتم بالناس اللي بتدرب تحت إيده ..

ثالثا : أنا بحب جدا وظيفة خدمة العملاء , لإن من كتر التعامل مع الناس ف الصيدلية وفيه خدمة توصيل للمنازل –تلي سيلز يعني-, اكتشفت إن عندي مرونة و فن ف التعامل مع العملاء ... وطبعا لو عاوز اشتغل الشغلانة دي ف شركة زي فودافون أو TEData , لازم تكون ف اللغة جيد جدا ع الأقل , وف السي في بتاعك دورات تؤهلك لكدة , وأنا فعلا كنت بدأت ف الدورات وخدت إعداد محاسبيين و بتش تري و English و بفكر أخد تنمية بشرية , بس عشان مافيش ممارسة طبعـا كل دة بيتنسـى .... فـا أعمل إية ؟؟!!


مـش عـارف أعمـل إية بجـد , أنا بدعي ربنا إنه يهديني ويوفقـني للي يحبه ويرضـاه عنـي ..

وجزاكم الله الفردوس

[abdorashad]

كلام جميل أخى ... انا لو منك أكمل فى مجال الصيدلة ... طالما فاهم فيه ....

[M.winner]

شكرا على اهتمام حضرتك :)

أنا فعلا بحب المجال دة , بس ربنا يسهل ..

[Mohamed Hosseny]

بسم الله الرحمن الرحيم


الموضوع ده يهمنى اوى .. عشان انا بردو حديث التخرج وكنت ايام الدراسة بردو بشتفل فى صيدليه وربنا كرمنى الحمد لله واتخرجت بتقدير..

احلام بين الواقع والخيال
هل من الممكن ان استمر فى مجال الصيدلية كمساعد صيدلى او فى اى مجال اخر خاص بالادوية فى مخازن الادوية مثلا او فى شركات الادوية كمندوب ادوية او مبيعات (المهم تكون حاجة فى مجال الادوية الى انا اتربيت فيه)

الرؤية الاستراتيجية
هل من الممكن ان يطور الفرد نفسه فى هذا المجال يعنى كمان سنة او سنتين او 10 سنين هبقى ايه صاحب شركة ادوية مثلا (الله اعلم )

الرسالة
التطوير العلمى والمنهجى وتطوير العمل الميدانى من اهم المراحل التى لابد ان يمتاز بها اى فرد سواء كان خريج جديد او عتيق(قديم) .. ولكن هل يحدث التطوير هباءا فى اى مجال ام هل هناك مجال محدد لابد ان يسير الفرد فيه وفقا لمادته العلمية الى سعى من اجل الحصول عليها.

الهدف الاستراتيجى
الهدف > هو الوضع المرجو للفرد فى المستقبل .. نتائج مطلوب الوصل اليها خلال فتره زمنية مححدة..
وهل هذا الهدف اثناء تحقيقه سوف يطور من الفرد ويرفع من درجته العلمية والعملية (هدف عن هدف يفرق) وطبعا اى هدف فى الدنيا ليه شروط (((شروط الاهداف))) اهم حاجه (المعايير)

الخلاصة
المعايير الواجب مراعتها عند اعداد الهدف سواء كان صيدليه ماجيستير دكتوراه محاسبه اى هدف فى الدنيا لازم يكون ليه معايير بتمشى معاه
1/ان يكون الهدف مرتبط بمجال محدد مش اه مجال خيالى والسلام
2/الهدف لازم يكون مرتبط باطر زمنى محدد مش سنين ضايعه على الفاضى وخلاص
3/الهدف لازم يكون قابل للقياس يعنى اقدر اقيسه ويكون واضح قدامى وشيفه بعنيا
4/واهم حاجه ان الهدف لازم يكون قاااااااابل للتحقق مش هدف اعجازى يعنى..

الخلاصة####
بالبلدى كده شوف ياعم الحاجة الى انتا بتحبها فى مجالك الى هو المحاسبة والمحاسبة طبعا مجالتها كتيير الحمد لله واختار الحاجة الى انتا ممكن تطور نفسك فيها وتعلى بيها بفضل ربنا طور نفسك فى الكورسات واسال عنها واللغة ......... سوف الهدف الى هتمشى عليه الاول زى ماقولت وتطور نفسك فيه لحد ماتوصل ليه


ملحوظة#####
قد تختلف الرؤية المستقبلية من شخص لاخر مع اختلاف الاستراتيجيات (الخطط) التى يمكن ان يتبعها كل فرد من اجل الوصول لهدفه

والله الموفق والمستعان وشكرا