أعمل كمحاسب فواتير بشركة سياحة، هل استمر في عملي أم أبحث عن مكان به محاسبة حقيقية ؟

[Ahmed_hekal]

السلام عليكم ورحمه الله وبركاته ......
فى البدايه احب احييكم على المنتدى الرائع ده وبجد انا استفدت منه كتير واتعلمت من اعضائه حاجات عمرى ما كنت هتعلمها من غير مساعدتهم.
انا خريج تجاره جامعه القاهره دفعه 2010 محاسبه بتقدير مقبول واخدت كورس جيل المستقبل والحمد لله الانجليش والكمبيوتر عندى بقو تمام جدا وربنا وفقنى واشتغلت فى شركه سياحه كبيره ومعروفه بس المشكله انى شغال محاسب فواتير وهو شغل بعيد عن المحاسبه
السؤال بقى انا عايز اخد رأيكو هل الخبره فى حسابات الفواتير فى شركه السياحه هتنفعنى ولا الحق نفسى و اشوف مكان اشتغل فيه شغل محاسبه حقيقى؟
اتمنى مساعدتكم.....وشكرا

[توفيق السيد]

على فكره
محاسب شغال فى مطعم غير محاسب شغال فى بنك
غير اخر شغال فى محاسبه التكاليف
غير بتاع المقاولات
غير بتاع التامين
غير بتاع الضرائب
غير بتاع البترول
غير بتاع السياحه
غير بتاع الفنادق
غير بتاع المحاسبه فى الوحدات الحكوميه
وغيرها الكثير من مجالات عمل المحاسب
ولن تجد ابدا محاسب يدرك بكل هذه الخبرات ويجمعها فى نفس الوقت
نصيحه منى انت حصلت على عمل وخبره فى مجال معين استمر فيها وحافظ عليها
اهم شىء يكون شغل حلال وفى مجال تخصصك الا وهو المحاسبه
بعدين يا سيدى بدأت بالفواتير
بكره ان شاء الله تبقى رئيس الحسابات او المدير المالى للشركه
والهم من ذلك تحدث معلوماتك فى مجال المحاسبه والشئون الاقتصاديه بصفه مستمره
وحاول تكتسب مهارات جديده وانت فى عملك ايضا

[محمد داوود]

السلام عليكم بص ياعمنا انا هاكلمك بالبلدي تمام الاخ توفيق معاه حق بجد انا اهو بإذن الله نازل شغل برضه حساب فواتير وف محل دهانات وألوان بالكمبيوتر ومش شركة اهو بس يعتبر ف اول الطريق وكمان ف المجال بتاعنا وعلي فكرة انا خريخ دفعة 2010 برضه بس جامعة عين شمس أهم حاجه حب الشغل اللي انت فيه وانت هاتبدع والله يابني وبإذن الله تعلي أكتر وتبقي حاجه كويسة ف الشركه إن شاء الله وربنا يوفقك يااااااااااااااااااااااااااااارب

[Ahmed_hekal]

شكرا يا جماعه على اهتمامكم وعلى سرعه الرد
شكرا يا استاذ توفيق على ردك وهحاول اعمل بكل نصايحك
وربنا يوفقك يا استاذ محمد ان شاء الله
المشكله اللى بتكلم فيها هى ان شغل الفواتير بعيد عن المحاسبه بينتمى ليها بمجرد الاسم بس والخبره اللى هاخدها هتبقى فى السياحه فقط يعنى لو حصل ظروف وغيرت المجال هيكون كانى بدأت من جديد وهو ده اللى انا خايف منه والوضع فى الشركه اللى بشتغل فيها مش مريح بالنسبه لى.
عشان كده عايز اعمل اى حاجه فى الفتره دى تنفعنى فى مستقبلى كورسات مثلا او اى حاجه انا تمام فى الاتجليش والكمبيوتر بس مش عارف محتاج اخد كورسات ايه تانى
ياريت لو حد يقدر يفيدنى

[ضـــــجـــــة]

your position is bad , no correct way
please , take the right way ,
trace aquire of experience and good proficience
good luck

[توفيق السيد]

تعرف ان محاسب فى بنك اذا راح يشتغل فى شركه مقاولات مثلا لا اقول لك لن يستطيع اداء العمل
ولكن سيجد مشقه كبيره حتى يتستوعب الاجراءات الجديده
حتى ربما يتهمه البعض بانه ليس محاسب مثلا
وانا لا اعتد بعد سنوات الخبره فى مجال معين
مثلا يقولك خبره 8 سنين
فى الواقع هى خبره واحده مكرره 8 مرات
والحل هنا هو وانت فى مجال عملك يمكن بعد شويه تاخد كورس محاسبه فى شركات البترول
او قطاع المقاولات
او تاخد اكسيل محاسبى
وتطور نفسك فى قواعد البيانات زى اكسيس واوراكل
واس كيو ال وغيرها
والمام ببعض قواعد البرمجه
وتقرأ فى محاسبه الضرائب والزكاه
واذا كان متاح تاخد دبلومه من الجامعه وانتا فى شغلك
المهم انك لا تتوقف عند حد معين
وبالتالى سوف تكون مؤهل ومهيأ للانتقال لاى مجال من مجالات عمل المحاسب
وتمنياتى لك بالتوفيق ان شاء الله

[Ahmed_hekal]

بجد الف الف شكر يا استاذ توفيق على اهتمامك وعلى سرعه ردك انا هحاول على قد ما اقدر اعمل بكلامك
جزاك الله كل خير