موزيكى

راينا فى المشهد السابق عبد الستار وهو قاعد ضارب لخمة ومش عارف يعمل ايه




وفجأة فتح الباب ودخل رجل فى حوالى الخامسة والاربعين من عمره وهو الاستاذ ( شاكر فضله ) زميل عبد الستار فى الشركة وبعد التعارف والترحيب دار بينهم الحوار التالى :




شاكر فضله : الشغل هنا بسيط وسهل وان شاء الله تكون مبسوط معانا

عبد الستار : ان شاء الله .. بس الحقيقة انا عندى مشكلة ،، وانا نسيت كل اللى اخدته فى الجامعة ومش عارف هشتغل ازاى




شاكر فضله : متقلقش خالص ، احنا هنا اسرة واحدة وبنساعد بعض وكلنا عارفين حديث رسول الله صلى الله عليه وسلم :

ـــــــ




عبد الستار : جزاكم الله كل خير




شاكر فضله : يلا بينا نبدأ الشغل ، انت طبعا عارف ان المحاسبة مهنة زى اى مهنة فى الدنيا




ليها أدوات ومصطلحات لازم اى محاسب يكون عارفها




عبد الستار : طبعا انا بعرف احسب واجمع واطرح كويس

شاكر فضله : انت كده جى تشتغل أله حاسبة مش محاسب

عبد الستار : مش المفروض المحاسب يعرف يحسب

شاكر فضله : الهدف من المحاسبة مش الجمع والطرح هدف المحاسبة فى المقام الاول هو توصيل المعلومات المالية عن نشاط الشركة للى محتاجينها

عبد الستار : ومين هما اللى عايزين معلومات مالية عن الشركة

شاكر فضله : دول ياسيدى بنسميهم ( مستخدمى المعلومات المحاسبية ) وهما :




1-ادارة المنشأة ( تحتاج معلومات لممارسة وظائف الادارة من تخطيط ، لرقابة ، لاتخاذ قرارات

2-اصحاب المنشأة ( المساهمين ) عايزين يعرفوا النتائج اللى بتحققها المنشاة ( ربح ولا خسارة ويعرفوا كمان كفاءة الادارة

3-الاجهزة الحكومية زى مصلحة الضرائب مثلا

4-الناس اللى بتتعامل مع الشركة زى العملاء والموردين والبنوك




شفت بقى الموضوع اكبر بكتير من الجمع والطرح ازاى




عبد الستار : الموضوع شكله كبير فعلا – بس قولى يا حاج شاكر احنا بنوصلهم المعلومات المالية دى ازاى عندنا هنا ناس بتوع دليفرى ولا من خلال الخط الساخن

شاكر فضله : لا يا ريس مش كده ، المعلومات المالية اللى بياخدوها على الجاهز دى بتتوضب عندنا الاول ونظبطها ونروقها ونوصلها لهم فى شكل جميل لغاية عندهم

عبد الستار : ايون يعنى بنعمل ايه ؟؟؟

شاكر فضله : بص ياسيدى احنا بنبتدى نسجل المعاملات المالية اللى بتحصل فى الشركة ( يعنى كل عملية فيها فلوس ( احنا بنسجلها ) وبعدين نصنف العمليات دى فى مجموعات شبه بعض وبعد كده نلخصها علشان الناس اللى محتاجينها .




عبد الستار : ده كلام جميل قوى يا عم شاكر .. كمل يا راجل كمل

شاكر فضله : متستعجلش يا عبد الستار ،، هنكمل بعد الفاصل

تابعونا على الفيس بوك : http://www.facebook.com/accountingmasri

موزيكى

شاكر فضله : شفت يا عبد الستار اد إيه المحاسبة مهمة ، وكام طرف يستخدم معلوماتها

عبد الستار : شفت يا خال ، بس انت قلت لى ان المحاسبة زى اى مهنة لها ادوات ومصطلحات ولغاية دلوقتى مشفتش من سعادتك اى حاجة منها




شاكر فضله : شوف يا سيدى : المحاسب راجل بيتعامل فى الفلوس وعلشان كده لازم تكون كل حاجة مظبوطة وموزونة بالشعرة ،




واحنا يا عبد الستار يا غلباوى بنبدأ شغلنا من ( المستندات ) يعنى مابنتحركش ألا اذا كان فى مستند بيثبت أن فيه معاملة مالية تمت ( مش لسه هتحصل )




عبد الستار فاتحا فمه : ها اا




شاكر فضله : يعنى يا عم مثلا لما بنبيع بضاعة ( فيه فاتورة بيع بتطلع ) ، لما بنشترى بضاعة ( بناخد فاتورة شراء ) ، مصارف تليفون ( فاتورة تليفون ) ، مرتبات ( كشوف مرتبات ) ، يعنى فيه مستندات كتير منها بيكون داخلى ( من داخل الشركة ) ، ومنها اللى خارجى ( بيجى من بره ) ،،

ودول يا عبد الستار بنسميهم [ المجموعة المستندية ]




اللى بيها بنثبت ان فيه حاجة حصلت لازم تسجل فى الدفاتر .




عبد الستار : دفاتر ايه دى يا حاج شاكر اللى هنسجل فيها




شاكر فضله : بما اننا بنتعامل فى الارقام وطالما ان العمليات اللى بتم كثير قوى يبقى لازم نكتبها ونسجلها علشان مننساش




عبد الستار : يبقى اجيب معايا شوية ورق وانا جى المرة اللى جاية




شاكر فضله : لا يا بنى دى دفاتر لها شكل معين متفق عليه وسط المحاسبين كلهم ، بنسجل فيها كل العمليات المالية اللى بتم داخل الشركة مرتبة بالتاريخ




عبد الستار : وايه هى دى الدفاتر يا عم شاكر وشكلها ايه ؟؟




شاكر فضله : ركز معايا يا عبد الستار :




اولهم ( دفتر اليومية ) وده بنسجل فيه من المستندات اللى بتجيلنا




ثانى حاجة : ( دفتر الاستاذ) وده بقى بعد مانسجل العمليات فى دفتر اليومية نبتدى نصنفهم ونبوبهم ونجمع العمليات المتشابهة مع بعض




عبد الستار : لسه فى حاجة تانية علشان انا ابتديت ازهق




شاكر فضله : اه طبعا لسه فى التقارير اللى بنلخص فيها كل اللى حصل وبنقدمها للى محتاجينها من داخل وخارج الشركة




عبد الستار : انجز يا حاج شاكر الله يبارك لك




شاكر فضله : اهمهم يا عبد هما ( قائمة الدخل ) ، وقائمة المركز المالى ( الميزانية ) وبنعملهم فى شكل مبسط ومفهوم وبنقدمهم فى الوقت المناسب




عبد الستار : بقولك يا ابو الشواكر انا تعبت وبكرة العيد ( كل سنة وانت طيب ) يبقى نكمل بعدين بقى




شاكر فضله : اوك يا عبده كل سنة وانت طيب وعيد سعيد عليك وعلى كل زمايلنا





تابعونا على الفيس بوك : http://www.facebook.com/accountingmasri