|
هااااام - لكل شاب بيدرس تجارة - لكل محاسب -لكل خريج - لاي شخص عنده استفسارات
السلام عليكم أيها الشعب الكريم :sm14:
كل عام وأنتم بخير وصحة وعافية أنا شاب مصري مغترب في الامارات في دبي بشتغل مدقق حسابات في أحد مكاتب التدقيق العالمية Big 4 من خبرتي المتواضعة في مصر والا مارات في مجال المحاسبة والمراجعة ومن دراساتي المتعددة أيضا في مجال المحاسبة والمراجعة حبيت أفيد الشباب المصريين الراغبين في اقتناص الفرص النادرة للعمل في الاسواق العالمية والمكاتب العالمية ياريت اي حد من الخريجين الجدد او الطلبة او المحاسبين ذو الخبرة عنده أي استفسار عن سوق العمل والمتطلبات والمؤهلات المطلوبة وكيفية الوصول الى مكاتب التدقيق العالمية بسهولة والعمل فيها أو اي استفسار اخر يخص المهنة يسألني وله عندي الجواب إن شاء الله ... وسوف أقوم بتقديم نصائح لكل الشباب (الطموح) الراغب في الوصول لأفضل الفرص في مجال المهنة ولأي شاب بيفكر بدخل كلية تجارة او لاي محاسب بيفكر يطور من نفسه برجاء الشخص اللي عنده إستفسار يوضع بياناته وموقفه الحالي من الشغل والدراسة و و عشان أقدر أعطيه توجيه صحيح بإذن الله إنتظروا قريبا بعض النصائح والتوجيهات المهمة للمحاسبين بشكل عام .. في إنتظار إستفساراتكم !! تحيــــــــــــــــاتي !!! |
مشاركة: هااااام - لكل شاب بيدرس تجارة - لكل محاسب -لكل خريج - لاي شخص عنده استفسارات
اولا : احب اشكرك على الموضوع دا لانه هيفيد ناس كتير
انا على من مصر 22 سنة خريج كلية تجارة دفعة 2008 شعبة محاسبة تقدير جيد ( جامعة بنى سويف ) . بالنسبة للكمبيوتر معايا شهادة icdl وبعرف اتعامل كويس جدا مع الاكسل وفكرة بسيطة عن peach tree , quickbooks العمل الحالى : امين خزينة باحدى جمعيات تنمية المشروعات الصغيرة والحرفية والاقراض بس المشكلة انى شايف ان الوظيفة الحالية لا ترضى طموحى الوظيفى .. فاريت تقولنا ايه الكورسات او الدراسة اللى ممكن اخدها عشان اكون ماهل للسفر و ازاى اعرف اسافر لاى دولة بدون مكاتب سفريات والنصب بتاعها |
مشاركة: هااااام - لكل شاب بيدرس تجارة - لكل محاسب -لكل خريج - لاي شخص عنده استفسارات
الاخ علي : لا شكر على واجب
الاكسل يعتبر حاليا ضروري جداااا لاي محاسب او مراجع وكويس جدا اتك بتعرف تتعامل معاه برامج المحاسبة كلها زي بعض ... يعني لو اتمكنت من برنامجين مشهورين زي كويك بوكس وبيتش تري يبقى كده ممتاز ... اي برنامج محاسبة هيمر عليك هتلاقي نفسك بتتعامل معاه بسهولة لان كل برامج المحاسبة فكرتها واحده أنصحك تركز جداااا على اللغة الانجليزية قراءة وكتابة واستماع وكلو... أنصحك كمان لو دراستك كانت بالعربي .. انك تروح مثلا الكلية بتاعتك وتشتري كتب تجارة انجليزي وبالتحديدة كتب المحاسبة المالية او اشتريها من اي مكتبة وتعرف كل المصطلحات بالانجليزي كويس جدا في الامارات معظم الشركات الكبيرة او مكاتب التدقيق بيتعاملو فقط بالانجليزي نصيحتي ليك أهم حاجة تكون محاسب معتمد certified او semi certified لو حابب مجال المحاسبة المالية أنصحك بشهادة ال CPA او ACCA لو حابب محال المحاسبة الادارية او محاسبة التكاليف انصحك بشهادة CMA السفر لاي دولة ممكن بس لو معاك مؤهلات زي اللي فوق هتسهل عليك الموضوع جدااااااا تحياتي |
مشاركة: هااااام - لكل شاب بيدرس تجارة - لكل محاسب -لكل خريج - لاي شخص عنده استفسارات
عدنا لكم حبيت أشارك معاكم خبرتي في مجال المحاسبة والمراجعة وأسواق العمل في الخليج او في مصر موضوعي بالتحديد هيكون عن مجال المحاسبة المالية والتدقيق اللي هما يعتبروا عصب مهنة المحاسبة ومفتاح النجاح لاي شخص طموح واللي فيهم بالتحديد تتوافر معظم فرص العمل وكمان الرواتب اللي زي العسل والكاش المحترم النصايح التالية للي حابب يمتهن المحاسبة المالية ومهنة التدقيق ( بالتحديد : خريجين قسم محاسبة ) خلينا نبتدي من الاول خالص : 1-تجارة عربي ؟؟ لو إنت خريج تجارة عربي زي حالاتي لازم يا أستاذي تعرف المحاسبة بالانجليزي ..... بأي طريقة ... انا مثلا اشتريت كتب المحاسبة المالية بالانجليزي من مكتبة الجامعة .. مع العلم نفس الكتاب ممكن تلاقيه بيتباع في المكاتب الخارجية ب 100 او 150 جنيه ... زاكرهم كويس جدااا .. اتعلم ومارس كل حاجة بالانجليزي 2-استعيد الذكريات : لو انت مخلص كلية وحاسس كده انك طلعت من المولد بلا حمص يعني حاسس انك مش فاهم كان بيحصل ايه في ال 4 سنين اللي فاتوا زيي كده مثلا .. كنت فاقد الوعي ل 5 سنين .. فنصيحتي انك ترجع لكتب سنة اولى وتانية وتالتة ورابعة وزاكرهم تاني (مش كلها .. المحاسبة الماليه في الاساس) ؟! ايوه زاكرهم تاني بس المرادي بفهم مش مزاكرة عشان عايز تنجح في الامتحان وخلاص .. لأ مزاكرة عشان تنجح في الحياة ...مزاكرة بفهم مش مزاكر حفظ ... لو محتفظ لسه بالكتب يبقى خير وبركه ولو مش محتفظ بيهم برضه روح مكتبة الجامعة واقف مع طلبة سنة اولى في الطابور واشتري الكتب تاني .... أيوه انا عملت كده مش عيب يا أستاذي! 3-الاساس : ركز جدااا على الاساسيات بتاعة المدين والداين وكتب المحاسبة المالية بتاعة سنة اولى وتانية بالتحديد... تمكن منها كويس جداا جدا ... هيه دي مفتاح النجاح! 4-الخبرة : حاول في بداية حياتك تشتغل الحاجة اللي تعلمك مش اللي تقبضك ... حاول تدور على شغلانه بتمارس فيها كل الحسابات مش حاجة معينة بس.. يعني مثلا لو انت محاسب عملاء او محاسب بنك .. مش وحشة بس برضه حاول تعرف كل حاجة بتمشي ازاي وحاول تتوسع وتشتغل على كل الحسابات المالية في الشركة ... يفضل تشتغل في شركة تجارية ( هيه دي اللي هتعلمك صح ) 5-اللغة : اللغة في رأيي اهم من شهادة الكلية نفسها ... لازم تتعلم انجليزي صح .. حاول يكون ليك هواية بالانجليزي سواء افلام – موسيقى – قراءة .. المهم تتعلم تتكلم وتسمع وتكتب وتقرا انجليزي صح .. للاسف الشباب المصري ضعيف جدا في الناحية دي مقارنة بشعوب دول اخرى زي الهند وباكستان والفلبين اللي واكلين 95 % من التورته في دول الخليج .. أقصد بالتورته : سوق العمل 6- الشهادة المهنية : حاليا في الوقت الحالي مع كثرة البشر وكثرة المعروض من العمالة .. أصبحت شهادة الكليه للمحاسب زي شهادة الثانوية العامة .... لااااااااااااااازم يكون معاك شهادة مهنية عشان تكون (محاسب معتمد) .. أنصحك بالشهادات التالية: لو حابب مجال المحاسبة المالية والتدقيق في عندك شهادتين: -شهادة الCPA - (شهادة أمريكية) : وتعني محاسب قانوني معتمد وطبعا الشهادة مكلفة جداااا وتحتاج سفر .... ممكن تسجل مع اي معهد او ممكن تزاكرها مع نفسك لو تقدر .. كل واحد وامكانياته المادية والفكرية (إسألني لو عايز معلومات اكتر عنها ) -شهادة ال ACCA : (شهادة بريطانية) : وأنا انصحك بيها لان تكاليفها أقل من ال CPA وامتحاناتها في مصر .. سجل مع اي معهدوابتدي فيها من دلوقتي حاااالا لانها بتاخد وقت وتعتبر زيها زي ال cpa (إسألني لو عايز تعرف معلومات عنها ) الشهادة دي مطلوبة جدا في الامارات وبالتحديدة في مكاتب التدقيق العالمية .. يوجد منها نوعين : نوع يستخدم المعايير البريطانية ونوع يستخدم المعايير الدولية .. أنصحك تقدم عليها بالمعايير الدولية ... مثلا عندنا في المكتب شهادة ال cpa شبه مرفوضة ... المكتب بيفضل الناس اللي معاها ACCA او معدي حتى كم جزء منها .. مجرد انك تذكر في CV بتاعك انك معاك ACCA او حتى بتدرسها وعديت كم امتحان منها بيعطيلك أفضلية رهيبة الشهادة ممكن تبتديها علطول بعد ما تخلص ثانوية عامة او ممكن تبتديها وانت في كليه .. نصيحة لكل شاب مصري لسه في الكلية او لسه مخلص .. ابتدي في دراسة الشهادة فوراااااااااااااااا .. يعني لو انت في سنة اولى كلية .. ابتدي فيها وعلى ما تخلص كليه هتلاقي نفسك خلصت الشهادة وبقيت محاسب معتمد بس متطلبات الخبرة هتاخدها في اي وقت بعدين.. واتفرج على الفرص اللي زي اللوزوالفلوس الحلوة سواء جوه مصر او بره وانا اضمنلك كده الشهادة مطلوبة في الامارات لانها بتستخدم المعايير الدولية والامارات تستخدم المعايير الدولية للأسف في دبي والامارات بشكل عام .. مهنة التدقيق مسيطر عليها الهنود والباكستانيين والفلبينينن .. كل دولة من الدول دي عندها جمعية محاسبين خاصة بيها لاعتماد المحسابين .. وبيعترفوا بيها في الامارات زيها زي الشهادة الاجنبية وزيها زي ال CPA الا عضوية جمعية المحاسبين المصرية اللي اعتقد غير معترف بيها هنا لان درسااتها بالعربي .. للأسف الشديد هديلكم مثال حقيقى : أغلب الشباب الهنود والباكستانيين اللي واكلين سوق العمل في الامارات بيخلص كلية وبيكون معاه الشهادة المهنية بتاعته جاهزة .. يعني ممكن يكون عنده 20 سنة بس وتلاقيه محاسب معتمد لانهم كلهم بيدرسوها وهما عندهم تقريبا 17 سنة مش زينا احنا نايمييييين في العسل ... ومستغربين ليه الفرص ضعيفة للمصريين في الخليج ! .. بس للاسف مكنش فيه حد ينصحنا وقتها عشان كده حبيت أنصح الشباب اللي حابب يوصل في مجال المهنة وحابب فرص أفضل 7-العمل بالنسبة للفرص الخارجية ممكن تشتغل في شركات او مكاتب تدقيق ... الافضل انك تبتدي في مكتب تدقيق كمساعد مراجع .. دي احسن حاجة ممكن خريج جديد يبتدي بيها حياته ودي هتوصلك لفرص ممتازة في المستقبل سواء في مهنة المحاسبة او المراجعة .. لو عايز تعرف مثال عن طبيعة الامتحانات في اماكن مثلا زي مكاتب التدقيق في الامارات إسألني وليك عندي الرد ان شاء الله اللهم قد بلغت .. اللهم فأشهد أتمتى اكون قدرت أفيد الشباب والشابات الواعدين.. وياريت اللي عنده اي استفسار يراسلني وانا حااااااااااااااضر |
مشاركة: هااااام - لكل شاب بيدرس تجارة - لكل محاسب -لكل خريج - لاي شخص عنده استفسارات
تحياتي ليك فعلا كلام جميل وانا كمان عملت كده وانصح الشباب الجديد بكده وارشح الموضوع لافضل موضوع في المنتدي عن شهر 9 وارشح العضو elkhouly افضل عضو مبتدي في المنتدي |
مشاركة: هااااام - لكل شاب بيدرس تجارة - لكل محاسب -لكل خريج - لاي شخص عنده استفسارات
بارك الله فيك موضوع شيق بس احنا عايزين متابعة
وياريت لو الموضوع ده يدرس على المنتدى يبى تمام والله والموفق |
مشاركة: هااااام - لكل شاب بيدرس تجارة - لكل محاسب -لكل خريج - لاي شخص عنده استفسارات
الاخ 1accountant
شكرا لك وتحياتي وتقديري ...يشرفني يا عزيزي ترشيحي وعلى راسي من فوق أنا غرضي من الموضوع توعية الشباب وتعريفهم بالحاصل في دول الخارج و مجال المهنة وايه المطلوب .. للاسف مكنش فيه حد ينصحنا واحنا في كلية ..بس الحمدلله بالجد والاجتهاد ممكن تتنتقل من مرحلة الصفر لاعلى المراحل اللي ممكن يوصلها خريج تجارة .. وتشتغل بجانب الامريكاني والبريطاني زيك زيهم مفيش فرق ... حبيت اشارك بكل خبرتي ومعرفتي مع كل الشباب ... واي حد عنده استفسار انا في الخدمة |
مشاركة: هااااام - لكل شاب بيدرس تجارة - لكل محاسب -لكل خريج - لاي شخص عنده استفسارات
الاخ محمود أبو الدهب .. تحياتي وتقديري
وانا على استعداد ان شاء الله لكافة الاستفسارات ... لعيون الشباب |
مشاركة: هااااام - لكل شاب بيدرس تجارة - لكل محاسب -لكل خريج - لاي شخص عنده استفسارات
جزاك الله خيرا سؤال : بالنسبه للخريج بعد ما ياخد كورس اللغه وicdl ,وان شاء الله يسافر للعمل هيكون فى صعوبه لانه مش عنده خبرة ولا الامر بسيط ؟ |
مشاركة: هااااام - لكل شاب بيدرس تجارة - لكل محاسب -لكل خريج - لاي شخص عنده استفسارات
موضوعك جامد اخر حاجه
انا محمد محي طالب كليه تجاره انجلش جامعه القاهره فاضلي سنتين واتخرج شور عندي خبره بالكمبيوتر وبالأكسل وبرنامج البيتش تري وكمان شفت الأكويك بس ما اتعاملتش معاه اوي وكمان ايه اللي ممكن اعمله ويكون مفيد ليا انا طوح جدا وعاوز اكون حاجه جامده مش مجرد محاسب كمان فياريت تقولي ايه المفيد وايه اللي ابدأ اضيفه ليا وبجد موضعك جامد وانا معا الاستاذ 1اكونتنت وربنا يوفقك معانا يارب سي يوو ليتر باي |
مشاركة: هااااام - لكل شاب بيدرس تجارة - لكل محاسب -لكل خريج - لاي شخص عنده استفسارات
الاخت أسماء .. لا شكر على واجب
بالنسبة لكورسات اللغة وال اي سي دي ال .. طبعا دي حاجة ممتازة ومفيدة جدااا .. بس الاهم من كده انك فعلا تتمكني من اللغة الانجليزية قراءة وكتابة واستماع .. يعني مش مهم شهادة كورس اللغة قد ما المهم انتي أدائك فيها عامل ايه ... بالنسبة لو معندكيش خبرة وحابة تسافري .. مش هتبقى مشكلة كبيرة بس نصيحتي ليكي خديلك كم كتاب معاكي من بتوع سنة اولى وتانية الخاصين بالمحاسبة المالية .. هتساعدك جدا في الشغل او في امتحانات التوظيف ويفضل تكوني درساهم بالانجليزي طبيعةشغل المحاسب في بداية حياته سهلة ومش معقدة لا تقلقي .. بتمنالك التوفيق |
مشاركة: هااااام - لكل شاب بيدرس تجارة - لكل محاسب -لكل خريج - لاي شخص عنده استفسارات
الاخ mohamed mouhye
لا شكر على واجب يا عزيزي... انا شايف انك ليك فرصة ممتازة جداا بما انك لسه مخلصتش كلية أنصحك تقدم فورا على شهادة ال ACCA .. هتاخد معاك تقريبا 3 سنين .. يعني اي محاسب دلوقتي لازم يكون معاك qualification .. وهي سهلة مش صعبة وهتمتحن كل 6 شهور مادتين .. يعني اتسلى فيها لحد ما تخلص كلية ( وانت فاضي ) لان لو اشتغلت بعد كده هتلاقي الامور صعبة جدا انك توفق بين المزاكرة والشغل..احنا الجيل القديم للاسف اتأخرنا جدا في الموضوع ده... صدقتي هتفتحلك مجالات كتير في البيج 4 في مصر زي حازم حسن ومنصور وبرسوم وغيرهم او حتى هتفتحلك مجالات كتير بره مصر ... ركز عليها جداااا ... طور نفسك في اللغة جداا .. تمكن منها ... هتفتلحك مجالات كتير جداااا حاول يكون هدفك من دلوقتي انك تدخل بيج 4 ...اصطادهم واحد واحد لما تخلص كلية.. صدقني هتكون الخطوة دي مفتاح النجاح طول حياتك ... من دلوقتي ممكن تسجل مع اي مكتب فيهم ك intern (متدرب ) في فترة الصيف ده موجود عندنا في دبي .. مش عارف موجود في مصر ولا لأ هتعطيلك ميزة لما ترجعلهم بتدور على شغل الكلام اللي فوق بيعتمد على انك تتخصص في كليتك (محاسبة فقط) أو الافضل ليك بالتوفيق |
مشاركة: هااااام - لكل شاب بيدرس تجارة - لكل محاسب -لكل خريج - لاي شخص عنده استفسارات
بسم الله الرحمن الرحيم الأخ و الأستاذ elkhouly موضوع متميز فعلاً ونأمل الأستمرار و العطاء و الله عنده خير المثوبة تم تثبيت الموضوع للأهمية و السلام عليكم و رحمة الله و بركاته |
مشاركة: هااااام - لكل شاب بيدرس تجارة - لكل محاسب -لكل خريج - لاي شخص عنده استفسارات
الاستاذ / أحمد فاروق سيد حسنين
تحياتي وتقديري يشرفني جدااا ان يتم تثبيت الموضوع وانه لشرف أعتز بيه ... ومسوؤلية أتمنى أن أكون قدها تحياتي للجميع |
مشاركة: هااااام - لكل شاب بيدرس تجارة - لكل محاسب -لكل خريج - لاي شخص عنده استفسارات
انا اشكرك جدا على المعلومات دى الجميلة
بس انامتخرجة واخدت كورس icdl واخدت دبلومة شاملة عنالدفتى وaccountوpeachtree ياترى اقدر اشتغل بيهم سواء فى الخارج او هنا فى مصر يؤهلنى للشغل لكن خبرتى بالانجليزى كويسة لكن مفيش كورسات |
مشاركة: هااااام - لكل شاب بيدرس تجارة - لكل محاسب -لكل خريج - لاي شخص عنده استفسارات
الأخت bsma152
ال icdl ضروري جداا وممكن يعطيكي ميزة في التوظيف يفضل لو تاخدي خبرة بسيطة قبل ما تسافري .. في وظيفة كمحاسب او مساعد محاسب حتى ولو براتب قليل المؤهلات اللي معاكي أكيد تأهلك للشغل .. مش كل الوظائف بتطلب محاسب خبرة .. حاول تركزي على الوظائف الخاصة بمساعد محاسب او محاسب وتطبقي عمليا الدبلومة اللي أخدتيها طالما خبرتك بالانجليزي كويسة مش ضروري جدا الكورسات ركزي على حاجة تانية انتي ضعيفة فيها .. أهم حاجة تحددي انتي عايزة تشتغلي ايه وفين وعايزة توصلي لايه تحياتي |
مشاركة: هااااام - لكل شاب بيدرس تجارة - لكل محاسب -لكل خريج - لاي شخص عنده استفسارات
بجد بجد مجهود رائع
انا اسمى محمد خريج تجاره قسم محاسبه 2007 ولسه مخلص جيش عندى مقابله بكره معايا icdl ودبلومه محاسبه الكترونيه وكويس فى الانجلش استماع كويس جدا كلام كويس وكتابه يعنى وعاوز نصايحك للمقابله دى هى مش اد كده بس زى ما انت بتقول انا عاوز منها خبره بس كمان عاوز اعرف منك التدرج الوظيفى للمحاسب ايه هوا ( اهم سؤال بالنسبه ليا ) يعنى انا لو اشتغلت محاسب او محاسب مساعد بعد 4 سنين مثلا هبقا ايه فاهم قصدى محتوى الدبلومه اكسل : الدفاتر كلها عليه وتصميمها والترحيل بين الحسابات وكده واليوميه الامريكيه طبعا وبيتش ترى وجزء بسيط عن الاكسس لو ربنا كرمنى او لا ف المقابله دى انته رايك المفروض اشتغل على ايه ف الفتره اللى جايه كورسات اقصد انا بجد طموح ونفسى ابقا حاجه فى يوم من الايام الحمد لله كويس جدا فى الكمبيوتر وخصوصا اكسل لانى درسته قبل الدبلومه مستنى ردك ياريت النهارده ياريت قبل ما اروح النتر فيو بكره |
مشاركة: هااااام - لكل شاب بيدرس تجارة - لكل محاسب -لكل خريج - لاي شخص عنده استفسارات
الأخ محمد أهلا وسهلا بيك وشكرا على المرور
أولا بتمنالك التوفيق في مقابلة بكرة بالنسبة للمقابلة زي ما انت قلت . مفيش مقابلة بتطلع منها خسران حتى لو خسرت الوظيفة بس المهم انك تستفيد منها . لو المقابلة على وظيفة محاسب بشكل عام .. أنصحك تراجع المعلومات الاساسية للمحاسبة المالية وتتدرب على عمل القيود وميزان المراجعة والميزانية وقائمة الدخل التدرج الوظيفي للمحاسب : هقلك من واقع خبرتي ومش شرط يكون ده التدرج الوحيد غاليا التدرج الوظيفي بيكون موجود في الشركات الكبيرة والضخمة او المكاتب المحاسبية وبيكون للمحاسب او المراجع اكتر من مسمى وظيفي - لو شركة صغيرة مبينكش في مسمى واضح .. يبقى اسمك محاسب وخلاص مثلا كالتالي في مكاتب المحاسبة Assistant Semi Senior Senior Supervisor Partner أعلى حاجة ممكن توصلها وانت في مكتب محاسبة هي (شريك ) أعلى حاجة ممكن توصلها في شركة هي المدير المالي أو مدير إداري أو لو ربنا كرمك مدير تنفيذي CEO في اغلبة الشركات الكبيرة في مصر .. المحاسب بيتخصص في حاجة واحدة بس : مثلا محاسب مشتريا ت - محاسب عملاء - محاسب مبيعات أفضل انك تختار وظيفة بتمارس فيها كل دول .. يعني لو شركة صغيرة شوية وهتمسك فيها كل الحسابات يكون أفضل لك أنت اللي تقول انت عايز تبقى ايه .. وبتعتمد انت حابب ايه .. وعايز توصل فين .. وعايز تتخصص في ايه بس على العموم لو مفيش هدف في دماغك محدد .. لو ابتديت مساعد محاسب ممكن بعد 4 سنين تشتغل محاسب أول او لو انت مجتهد ممكن تكون مدير مالي رأسا .. على فكره أعمار المدرا الماليين انخفضت جدا وممكن تلاقي دلوقتي مدير مالي وعنده 27 سنة .. مش زي زمان .. لكل مجتهد نصيب ممكن كمان تفتح مكتب محاسبة خاص بيك وتمارس فيه كل الانشطة المحاسبية والضريبية والاستشارية وتسجيل الشركات ..... نصيحتي ليك الفترة الجاية انك لازم تاخد ال qualification المناسبة ليك ... دي أهم حاجة ممكن تعملها الفترة الجاية .. وبعد كده مع الخبره والشغل والدراسة هتتضح الرؤيا بالنسبالك وتحدد انت حابب تكمل في ايه أمثلة للشهادات المهنية الي تعتبر أهم حاجة المفروض تبتدي فيها من دلوقتي والمعروفة والمنتشرة في السوق CPA : شهادة تخصصية في المحاسبة المالية والمراجعة والضرائب ACCA : زي اللي فوق باختلافات بسيطة CMA : شهادة تخصصية في مجال المحاسبة الادارية ومحاسبة التكاليف والاقتصاد وبعدين في رأيي اي كورسات تاخدها وحاسس هتضيف لك ولخبرتك خدها بس الاهم الشهادةالمهنية في عندك المجاستير من اي جامعة في مصر او ال MBA كمان مميزة جدا تحياتي |
مشاركة: هااااام - لكل شاب بيدرس تجارة - لكل محاسب -لكل خريج - لاي شخص عنده استفسارات
بجد بجد مش عارف اشكرك ازاى
كمان لو فيه هنا ف المنتدى موضوع يخلينى اعرف اراجع منها المعلومات الاساسية للمحاسبة المالية وتتدرب على عمل القيود وميزان المراجعة والميزانية وقائمة الدخل ولو مفيش ان برضه شاكر اهتمامك البالغ وجزاك الله خيرا |
مشاركة: هااااام - لكل شاب بيدرس تجارة - لكل محاسب -لكل خريج - لاي شخص عنده استفسارات
استاذى انابعتلك رسالة
فبن الردددددددددددددددددددددد |
مشاركة: هااااام - لكل شاب بيدرس تجارة - لكل محاسب -لكل خريج - لاي شخص عنده استفسارات
الرسالة
ارجو الافادة السلام عليكم انا خريج 2008 بس سنى 25 دراستى استمرت 8سنين مش غباء بس كنت شغال المحاسبة والادارة والاقتصاد تقديراتى فيهم جيد ومقدم فى دبلومة ضرائب واللغة جيد ونفسى اوصل لاخر المهنة دى اعمل ابة الشهادة المهنبة عرفت انة لازم شغل سنتبن ف مكتب وبعدين تقدم النصيحة |
مشاركة: هااااام - لكل شاب بيدرس تجارة - لكل محاسب -لكل خريج - لاي شخص عنده استفسارات
اقتباس:
العفو يا سيدي .... لو حابب تدور في المنتدى ... أعتقد ممكن تلاقي المعلومات اللي انت عايزها في منتدى المحاسبة المالية .. أو ممكن تستخدم خاصية البحث ... تحياتي |
مشاركة: هااااام - لكل شاب بيدرس تجارة - لكل محاسب -لكل خريج - لاي شخص عنده استفسارات
اقتباس:
الاخ hamada846284 لا عليك يا عزيزي .. عمرك بالنسبة لسنة تخرجك ليس بهذا السوء أهم حاجة لازم يكون ليك هدف واضح وتخصص واضح على الاقل في بداية حياتك وبعدين ممكن تتوسع ان شاء الله في المستقبل .. متحاولش تشتت نفسك وتتخصص في كل حاجة .. بس دي برضو ميزة كويسة لكنها مجهدة شوية وبتعطلك طالما انك قدمت في دبلومة ضرائب هفترض انك هتتخصص ضرائب؟ يا ريت تبعتلي وتقلي انت حابب تتخصص في ايه : محاسبة ولا ادارة ولا اقتصاد ولا ضرائب عشان اعرف اوجهك واقلك توصل ازاي لاخر المهنة دي .. لان المهنة دي فيها مجالات كتير جدااا تحياتي |
مشاركة: هااااام - لكل شاب بيدرس تجارة - لكل محاسب -لكل خريج - لاي شخص عنده استفسارات
الاخelkhouly
اشكرك على الرد انا كل هدفى انى إن شاء الله اسافر بعد 3 سنين لاءى دولة من دول الخليج وعشان كدة قدمت ف دبلومة الضرائب على اعتبار انهامناسبة ومفيش مكان من غير ضراءب وتكون ميزة تشفع ف تعيني ف اى مكتب محاسبة اقدر من خلالة اكون محاسب اولا ثم محاسب معتمد بعدها اكون حر ف الا نتقال للمكان (وإن شاء الله بعد اول سنة ف الدبلومة هقدم على الشهادة المهنيةلوتعرف بتاخداد اية وقت ياريت تقولى) اللى احس ان ليا فية النص بصراحة بعد الكلام بتاعك بداءت افكر ف تغير الدبلومة الى المراجعة ياريت تقولى رائيك المحاسبة والادارة والاقتصاد دى المواد اللى كنت بذاكرها من الكتب وتقديري فيها جيد ولك الف شكر على ما تقوم من نصيحة لى ولغيرى |
مشاركة: هااااام - لكل شاب بيدرس تجارة - لكل محاسب -لكل خريج - لاي شخص عنده استفسارات
العفو يا سيدي
نصيحتي ليك .. لو عايز تعرف الدنيا ماشية ازاي دلوقتي ؟ الشهادة المهنية أهم حاليا من دبلومة الضرائب .. بس أهم حاجة إنت شايف نفسك فين ؟ ضرائب ولا محاسبة ولا مراجعة؟ أهم حاجة يكون ليك هدف واضح تمشي عليه وتحاول توصله وبناء عليه تبتدي تنفذ سواء هتتخصص ضرايب ولا مراجعة أنصحك فورا تقدم على الشهادة .. في الغالب acca(أسهل) ... أو cpa ... لا تنتظر أبدا .. لانها بتاخد وقت وبتاخد سنين .. هيه بتتاخد في اي وقت سواء دخلت مكتب محاسبة ولا لأ .. بالعكس هيه هتكون سبب سهل لدخولك مكتب المحاسبة خصوصا الكبار منهم .. حتى هتاخد عليها مخصص اضافي كامتياز مع الراتب ( ده لو هيه معاك ) عموما مجرد دخولك اي مكتب محاسبة من المكاتب ال 4 الكبار .. هتلاقي مجالات واسعة جدااااا .. وهتقدر تتنقل بين اي مجال انت عايزه زي المحاسبة .. الضرائب .. الاستشارات ..التدقيق .. وغيرههم كثير .. بس أهم حاجة تثبت نفسك وتبتدي صح .. لو لقيت الموضوع صعب .. ابتدي مع مكتب محاسبة عالمي غير ال 4 كبار او لو صعب .. شوف مكتب مصري كبير .. ابتدي دراسة الشهادة ... وارجع قدم عند ال 4 الكبار تاني وتالت .. لحد ما تظبط معاك تحياتي |
مشاركة: هااااام - لكل شاب بيدرس تجارة - لكل محاسب -لكل خريج - لاي شخص عنده استفسارات
زميلنا الفاضل
اشكرك على النصائح الغالية فأنا من الجيل القديم اللي فاتني موضوع الشهادة المهنية و معرفتهاش الابعد التخرج و التقديم في الجيش انا كنت حابب ادرس ال cma لكن مافيش وقت بسبب العمل انا دلوقتي قائم بأعمال رئيس حسابات شركة اجنبية و تعبت كتير لحد ما بقيت في المنصب ده و بحتهد علشان اكون رئيس الحسابات ان شاء الله انا بدأت بدورة محاسبة انجليزي و الحمد لله انتهيت منها و كمان كورس تكاليف و تقريبا انتهيت منها عدا درس واحد و هبدأ بالمعايير و برنامج محاسبي و دورة بيزنس متقدمة و الان حسب وقتي بالعمل صعب جدا اوفق و ارتب نفسي لدراسة ال cma و لكني احاول ان ارتب نفسي و مواعدي و متى استطعت ذلك بدأت فورا اسف للاطالة و لكن كان المقصود ضم صوتي لصوتك على اهمية الشهادات المهنية و اشكرك للمرة الثانية على الافادة مشكوووووور والله يعطيك الف عافيه |
السلام عليكم ورحمة الله وبركاته
متشكرين ليك جدا الآخ elkhouly اعانك الله على النصيحة دائما ورقنا واياك من المال والصحه والكلمه الطيبه استفسار صغير لو أمكن انا شاب مصرى عندى 26 عاما خريج تجاره شعبة محاسبه لا افهم شىء فى المحاسبه بس للآسف سافرت السعوديه وشغال دلوقت محاسب فى شركة تقنية معلومات مثل الرسائل التبادليه والتسويق العقارى اللاكترونى وتصميم صفحات الانترنت وتصميم البرامج المهم الشركة لسه بتتأسس من جديد وانا المحاسب الوحيد اللى فيها ولا ولا ولا افهم شىء انا كل اللى عملته فى الاكسل مصاريف تأسيس ايه الخطوه اللى بعد كدا مش عارف سايب الدنيا هى اللى تمشينا على كيفها وشكرا والسلام عليكم اه وياريت تعرفنا الشهادة دى ازاى ناخدها فى مصر وازاى ناخدها فى السعوديه ياريت تعرفنا ولو امكن تعطينا رقم الجوال للمعاهد دى او الموقع الخاص بالشاهدة دى وشكرااااااااااا وكم تكلفة الشهادة دى تقريبا اكيد يعنى انت عارف تكلفتها كام بما انك اخذتها |
مشاركة: هااااام - لكل شاب بيدرس تجارة - لكل محاسب -لكل خريج - لاي شخص عنده استفسارات
اقتباس:
العفو يا زميلي الفاضل بالتوفيق إن شاء الله في حياتك المهنية ومبروك مقدما ... إستمر في الكورسات اللي انت بتاخدها لانها بتضيف ليك اكيد وبتطور من قدراتك في مجالات عديدة .. أما بالنسبة للشهادة المهنية فهي عايزه صبر وعزيمة .. في ناس بتشتغل 14 ساعة في اليوم وبرضو بتلاقي وقت للدراسة .. بس هيه محتاجه تنظيم وقت .. تحياتي |
مشاركة: هااااام - لكل شاب بيدرس تجارة - لكل محاسب -لكل خريج - لاي شخص عنده استفسارات
السلام عليكم أستاذ
Elkhouly كنت أود الأستفسار بخصوص التدريب فى مكتب محاسبة ومراجعة مع محاسب قانونى حيث أنى مازلت طالب فى الفرقة الثالثة كلية تجارة.هل سيكون مفيد أم لا ؟ شكراً لتعاونك معنا ووفقك الله فى حياتك العميلة |
مشاركة: هااااام - لكل شاب بيدرس تجارة - لكل محاسب -لكل خريج - لاي شخص عنده استفسارات
ممكن توضيح اكتر عنا الشهادات
|
مشاركة: هااااام - لكل شاب بيدرس تجارة - لكل محاسب -لكل خريج - لاي شخص عنده استفسارات
(إسألني لو عايز معلومات اكتر عنها )
acca مدتها كام سنة وبتتدرس فين ولية ليها الافضلية cpa تكاليفها واية الفرق بين الاتنين على كافة المستويات(الشغل/المنهج /مدى اضافتهم ليك كمحاسب) وانسى موضوع الاسهل |
مشاركة: هااااام - لكل شاب بيدرس تجارة - لكل محاسب -لكل خريج - لاي شخص عنده استفسارات
اقتباس:
مصاريف التأسيس تعتمد معالجتها على المعايير المحاسبية المستخدمة في السعودية .. لو كانت معايير دولية .. يتم استهلاك كل مصاريف التأسيس فورا في الفترة التي تحققت فيها الا الجزء المصروف منها على شراء أصول ثابتة .. في هذه الحالة تسجل كأصول و ليس كمصروف أنصحك تستعين بمحاسب له خبرة في بداية حياتك .. حتى تستطيع الاعتماد على نفسك لاحقا حاول تأهل نفسك أولا محاسبيا قبل ماتبتدي دراسة أي شهادة حتى لا تواجه صعوبة الشهادة: -مصاريف التسجيل الابتدائية حوالي 400 ريال سعودي -لو معاك بكالوريوس من جامعة معترف بيها هتاخد إعفاء 4 مواد : تكلفتهم حوالي 1260 ريال -المواد المتبقية 10 مواد كل امتحان يتكلف حوالي 400 ريال -مصاريف تسجيل سنوية تعادل تقريبا 400 ريال -يوجد مراكر معتمدة في مصر والسعودية لتدريسها .. ممكن تبحث عنهم في الرابط التالي: (أختار دولة البحث السعودية او مصر وهيطلع معاك المراكز المعتمدة للتدريس في كل دولة) https://portal.accaglobal.com/accawe...hVO1Table.jspx الموقع الرئيسي: www.accaglobal.com تحياتي |
مشاركة: هااااام - لكل شاب بيدرس تجارة - لكل محاسب -لكل خريج - لاي شخص عنده استفسارات
اقتباس:
لاشك أن التدريب سوف يكون مفيد طالما هيكون تخصصك (محاسبة ) .. يفضل لو تتم تدريبك في مكتب محاسبة شهير لتعظيم الفائدة تحياتي |
مشاركة: هااااام - لكل شاب بيدرس تجارة - لكل محاسب -لكل خريج - لاي شخص عنده استفسارات
لكل الناس اللي بتسأل عن الشهادات:
CPA شهادة أمريكية .. في الغالب خاصة بممارسين مهنة التدقيق .. الشهادة معترف بها عالميا .. ومطلوبةجدا في اي مجال .. مشكلتها الوحيدة لازم تسافر أمريكا تمتحن تكاليف ال CPA بيعتمد علىأي معهد هتسجل معاه وأي منهج هتدرسه .. في أماكن غالية جدا وفي اماكن رخيصة .. أو ممكن تدرسها دراسة ذاتية وتتكلف فقط الكتب والسفر (بس لازم يكون عندك خلفية قوية جدا بشكل عام عشان تختار اخر اختيار) في الوقت الحالي أعتقد ال CPA ممكن تكاليفها تبتدي من 4000 دولار الى فوق CPA الدراسة بالمعايير الامريكية فقط أنظر مشاركتي السابقة لمعرفة تكاليف ال ACCA أو ممكن تدرسها دراسة ذاتية وتتكلف فقط الكتب و مصاريف الامتحان بس لازم يكون عندك خلفية قوية جدا ACCA شهادة بريطانية معادلة لشهادة ال CPA و تؤهلك الشهادة لممارسة مهنة التدقيق في الممكلة المتحدة ..ودول اخرى عالميا .. بجانب انها معترف بها في معظم دول العالم ما عدا أمريكا وكم دولة . .(عيبها الوحيد ان اي حد ممكن يقدم عليها حتى لو مفيش معاه شهادة كلية ) بعكس ال CPA وده نوعا ما بيخليها ضعيفة لكن على العموم هيه معترف بيها عالميا ما عدا كم دولة زي امريكا وكندا ( ده لو انت مش بتفكر تشتغل هناك ) ACCA تستخدم معايير بريطانية او دولية (اختياري) مدة الشهادة في الغالب 3 سنين أماكن التدريس على الرابط التالي https://portal.accaglobal.com/accawe...hVO1Table.jspx الشهادة نوعا ما أسهل من ال CPA لان امتحاناتها في اي دولة من العالم .. والنجاح فيها من 50 أما ال CPA النجاح فيها من 75 .. بس تتطلب الشهادة لغة انجليزية نوعا ما ممتازة .. لانها امتحانات يدوية ( ورقة وقلم ) اما ال CPA فكل الامتحانات على الكمبيوتر الشهادتين مهمين لاي محاسب لانها تعطيك صفة (محاسب قانوني ) ودي تعتبر أهم صفة مطلوبة ومتوقعة من أي محاسب حابب يشتغل في شركات ومكاتب عالمية في الوقت الحالي .. يعني اي محاسب في الوقت الحالي لازم يكون Certified .. من اي جمعية محاسبية معترف بيها .. سواء مصرية .. أمريكية .. بريطانية الشهادتين بيؤهلوك لممارسة مهنة التدقيق بشكل خاص لكنها ليست حكرا على المدققين.. المنهاج في الشهادتين بيركز على المحاسبة المالية والضرائب والتدقيق وقليل من المحاسبة الادراية ومحاسبة التكاليف وبعض المواد الادراية شهادة ال ACCA فيها ميزة انك بعد ما تخلصها .. ممكن تواصل دراسة بسيطة وتحصل على التالي: 1-عضوية جمعية المحاسبية القانونيين لانجترا وويلز ICAEW وتكتسب صفة ACA Associate Chartered Accountant أعتقد تتطلب دراسة لمدة سنة بعد ما تخلص ال ACCA او عدد سنين خبرة معينة ICAEW هي أقوي وأقدم جمعية محاسبين قانونيين في بريطانيا ملاحظة : ACCA ( اللي هيه مجال موضوعنا ) هي ثاني أقوى جمعية محاسبين في بريطانيا 2-بكالوريوس فخري في المحاسبة التطبيقية من جامعة اوكسفورد في بريطانيا.. كل اللي عليك وانت بتسجل معاهم تختار الاختيار ده .. تعدي امتحانات معينة في ال ACCA .. تعمل بحث بسيط .. ومبروك عليك البكالوريوس (فوق البيعة ) يارب أكون قدرت أوصلكم فكرة بسيطة عن الشهادتين تحيــــــــــاتي |
مشاركة: هااااام - لكل شاب بيدرس تجارة - لكل محاسب -لكل خريج - لاي شخص عنده استفسارات
احيك بجد على موضوع المتميز دا بس ياريت الاستمرارية انا عندى استفسار بخصوص شهادة acca هل استطيع دراستها selfstudy واذا امكن كيف يمكننى التسجيل بمفردى فى شهادة وتسجيل لامتحاناتها وكيف يمكننى ارسال اوراقى لجمعية وماهى اسعار امتحان المادة الواحدة ورسوم العضوية
|
مشاركة: هااااام - لكل شاب بيدرس تجارة - لكل محاسب -لكل خريج - لاي شخص عنده استفسارات
اقتباس:
لازم الشباب في مصر تفكيره يتغير .. عشان يعرف يواكب متطلبات سوق العمل ... الناس اللي بتوصل بسرعة بتخلص كليه أو ثانوية عامةوتعمل شهادة المحاسب القانوني وتشتغل.. وبعدين تكمل دراسة وتتوسع في شهادات اخرى ومجالات اخرى زي ال cma mba cia cfa وغيرهم الكثير الشباب في مصر ماشي بالعكس .. يخلص بكالوريوس وبعدين دبلومة وبعدين ماجستير ويا عيني قاعد يصرف دم قلبه ولسه مشتغلش.. وفي نفس الوقت في الناحية الاخرى من العالم .. في باكستان مثلا .. الواحد بيخلص ثانوية عامة ويعمل شهادة مهنية وينزل سوق العمل في دول الخليج وياخد الفرص المحدودة للمتميزين ويشتغل بأعلى راتب .. وبعدين يكمل دراسته انا مش ضد الدراسة والدبلومة بالعكس ... بس في اولويات أنا بنصحك وبنصح غيرك من واقع احتكاكي واطلاعي على بيئة المهنة في اكتر من مكان بشكل عام .. ممكن انت لسه مشتغلتش ولا لفيت .. وانا عارف ان في ملايين الخريجين ماشيين بنفس الطريقة دي (الكلاسيكية ).. تحـــــــــــياتي ! |
مشاركة: هااااام - لكل شاب بيدرس تجارة - لكل محاسب -لكل خريج - لاي شخص عنده استفسارات
الله يجزيك كل خير على كل الجهود اللي تبذلها عشان الشباب000سؤالي هو ايش نصصيحتك لحديثي التخرخ في الدول العربية اللي مش لاقي وظيفة لانه ما عندوش خبرة 00لكن عنده ارادة قوية ان يحقق المستحيل 00
|
مشاركة: هااااام - لكل شاب بيدرس تجارة - لكل محاسب -لكل خريج - لاي شخص عنده استفسارات
الاخ elkhouly
والله والله م عارف اشكرك ازاى مشاركتك نورت 90% من العتمة اللى ف دماغى عن الشغل ف مهنة المحاسبة استاذى العزيز الشغل بالنسبة لى كيانى وطموحى الحلم الذى لا ينتهى لازم يبقى فية جديد انا فعلا بدور على شغل فى اى مكان مؤقتا لحد مايبقى معايا المؤهلات اللى تخلينى مطلوب الدبلومة قدمت فيها عشان تقديرى للاسف مقبول والمكاتب الكبيرة بتشترط جيد وبعدها ااقدم ف جمعية المحاسبين والمراجعين المصرية وتبقى هى دى البداية وشكرا ليك بكل لغات العالم |
مشاركة: هااااام - لكل شاب بيدرس تجارة - لكل محاسب -لكل خريج - لاي شخص عنده استفسارات
اقتباس:
الشهادة يمكن درساتها self study بس يفضل يكون عندك خبرة قوية شوية والا هتكون بعض المواد صعبة الفهم لو هتختار كده : اشتري الكتب - واهم حاجة كتاب الامتحانات وتدرب على حل الاسئلة كويس جدا يوجد ناشرين فقط : Kaplan & BPP استعين بالموقع الرئيسي اللي فيه معلومات مفيدة جدا عن كل مادة والامتحانات وكيفية التسجيل : كل ده ممكن يتم مباشرة بينك وبينهم كالتالي: http://www.accaglobal.com/students/acca/ 1-اعمل تسجيل اونلاين من الوصلة التالية واتبع الخطوات https://portal.accaglobal.com/regexw....jspx?source=W 2-في نهاية التسجيل هيطلب منك طباعة صفحة معينة فيها رقم الطلب ويطلب منك ترسلها الى بريطانيا مع صورة من جوار السفر - وصورة من بيان درجات معتمد وعدة مستندات اخرى 3-هيردوا عليك بعدها ب اسبوعين عشان تدفع المصاريف حوالي 66 باوند .. ادفعها عن طريق bank draft من اي مكتب صرافة 4-وبعدين تدفع مصاريف مواد الاعفاء ثم مصاريف الامتحان للمواد التي ترغب بأدائها بكريدت كارد (الامتحانات تعقد مرتين في السنة فقط .. يونيو وديسمبر .. في العادة الناس بتدخل مادتين بس في كل مرة .. لو انت متفرغ ممكن تدخل اكتر من مادتين ) راجع الردود السابقة وهتلا قي فيها معلومات عن التكاليف يوجد موقع مجاني يوجد فيه ملخصات ممتازة ومحاضرات مجانية وكل اللي عليك بعد كده تتدرب على الاسئلة من كتاب الامتحانات ! http://www.opentuition.com/acca/ مثال للمحاضرات المتوفرة عن مادة من المواد http://www.opentuition.com/acca/f5/index.php بالتوفيق................ |
مشاركة: هااااام - لكل شاب بيدرس تجارة - لكل محاسب -لكل خريج - لاي شخص عنده استفسارات
اقتباس:
ممكن تشوفي رودوي السابقة هتلاقي أسئلة مشابهة لأسئلتك .... أهلي نفسك محاسبيا كما ذكرت في رودود سابقة .. وتمكني من الاساسيات ... طوري نفسك في اللغة .. تحياتي |
| الساعة الآن 07:11 PM |
Powered by Nile-Tech® Copyright ©2000 - 2024